Búgin 1 qyrkúiek – Bilim kúninde Jetisý oblysynda eki jańa mektep ashyldy. Sondai-aq 2 mektep kúrdeli jóndeýden keiin qoldanysqa berildi. Osy kúni iske qosylǵan jańa bilim mekemesiniń biri - Tekeli qalasy Rýdnichnyi aýylyndaǵy mekteptiń saltanatty ashylýyna oblys ákimi Beibit Isabaev qatysty. Atap ótsek, osydan bir jyl buryn óńir basshysy men Bas prokýror Berik Asylov bul mekteptiń irgetasyna «Ýaqyt kapsýlasyn» salǵan bolatyn. Bul ǵimarat Bilim berý infraqurylymyn qoldaý qorynyń esebinen boi kóterdi, dep habarlaidy dalanews.kz.
Óz sózinde óńir basshysy aýyl turǵyndaryn jańa nysannyń ashylýymen quttyqtap, adami kapitaldy damytý men bilim salasyn qoldaý memlekettik saiasattyń negizgi basymdyǵy ekenin atap ótti:
- Prezidenttiń kitap oqityn, sapaly ult qalyptastyrý bastamasy eń aldymen bilim men ǵylymǵa umtylǵan, qoǵamdyq mádenieti joǵary, zerdeli urpaq tárbieleýden bastalady. Osy oraida jastardyń sapaly bilim alýyna qolaily orta qalyptastyrý úshin mektepterdi jańǵyrtý kezeń-kezeńimen júrgizilip keledi. Atap aitqanda, oblys qurylǵannan beri 24 bilim berý nysany jańadan boi kóterip, 27 nysan kúrdeli jóndeýden ótti. Biz bul baǵyttaǵy jumysty ary qarai da jalǵastyramyz, - dedi Beibit Isabaev.
Munan soń oblys prokýrory Baýyrjan Jumaqanov sóz sóilep:
- Memleket basshysy qaitarylǵan aktivterdi el igiligine paidalaný jóninde naqty mindetter júktedi. Osy tapsyrmany oryndaý baǵytyndaǵy jumystar Bas prokýratýranyń baqylaýynda júzege asyrylýda. Búginde sol jumystardyń naqty nátijesin kórip otyrmyz. Osyndai áleýmettik mańyzy zor nysandardyń boi kóterýi – el igiligine baǵyttalǵan jumystardyń jemisi. Bul – balalarymyzdyń sapaly bilim alýyna jasalǵan úlken múmkindik, - dedi ol.
Mekteptiń sivoldyq kiltin tabystaý rásiminen keiin mekteptiń ashylý lentasy qiylyp, jinalǵan qonaqtar jańa ǵimarattyń ishin aralap kórdi.
Mektep direktory Ásel Jaqsybaevanyń aitýynsha, bilim mekemesi 200 oryndy, oǵan qosa 30 tárbielenýshige arnalǵan shaǵyn ortalyǵy bar. Munda ashana, akt zaly, fizika, himiia, biologiia, tsifrlyq formattaǵy mýltimediialyq kabinet, sheberhanalar qarastyrylǵan. Biylǵy oqý jylynda 145 oqýshy oqidy, 38 pedagog jumys isteidi.
Jańa mektepte eńbek etetin muǵalimder arasynda biyl jumysqa turǵan jas maman da bar.
- Men Semei qalasyndaǵy Shákárim atyndaǵy ýniversitetti bitirip keldim. Alǵashqy jumys ornymdy jańa mektepte bastap jatqanyma qýanyshtymyn. Qazaq tili men ádebieti páninen sabaq beremin, 7 synyp jetekshisimin. Oqýshylardyń zeiinin ashýǵa, tereń bilim berýge, mektepke eńbegimdi sińirýge bar kúsh-jigerimdi jumsaimyn, - dedi jas maman Balnur Otarbai.
Jańa mekteptiń ashylýyna qatysty ata-analar men oqýshylar da pikir bildirdi.
- Otbasynda bes balam bar. Balalarymnyń bári osy Rýdnichnyi aýylynyń mektebinen bilim alýda. Úlken qyzym Altyn belgige bitirip, qazir joǵary oqý ornynda fizika pániniń muǵalimi mamandyǵyna oqyp jatyr. Tórt balam búgin jańa mektepke keldi. Burynǵy ǵimarat qysta sýyq boldy, balalar syrt kiim kiip otyratyn. Jańa mektep zamanaýi, munda bilim alýǵa qajetti barlyq jabdyqtar bar. Osy igi iske atsalysqan barsha azamattarǵa alǵys aitamyn, - dedi kóp balaly ana Ainur Jaqiia.
- Ózim robototehnikamen ainalysqandy jaqsy kóremin. Burynǵy mektepte oǵan múmkindik joq edi. Qazir jańa ǵimaratta robototehnikaǵa arnalǵan arnaiy kabinet bar. Osy kabinette top bolyp, túrli robottar qurastyrýdy úirenemiz. Bul bizdiń IT salasynyń alǵashqy álippesin mektep qabyrǵasynan bilip shyǵýymyzǵa kóp kómegin tigizedi dep oilaimyz, - deidi 10-synyp oqýshysy Miras Nurshatuly.
Jalpy, biylǵy jańa oqý jylynda óńirde eki jańa mektep – Tekeli qalasy Rýdnichnyi aýylyndaǵy № 7 mektep pen Panfilov aýdany Súptai aýylyndaǵy orta mektep, sondai-aq kúrdeli jóndeýden ótken taǵy eki - Kóksý aýdany Boztoǵan aýylyndaǵy Musabek atyndaǵy jáne Eskeldi aýdany Eltai aýylyndaǵy Sáken Seifýllin atyndaǵy mektepter qoldanysqa berildi.
Oblys qurylǵannan beri atqarylǵan sharalardyń arqasynda áleýmettik sala nysandarynyń jańartylý deńgeii 55,8% boldy. Sonymen qatar 2022 jyly oblysta beiimdelgen mektepter sany 75 bolsa, qazir bul kórsetkish 37-ge deiin qysqarǵan.
Eske salsaq, qaitarylǵan aktivter esebinen oblys aýmaǵynda jalpy sany 29 nysan salynýda, sonyń 4-eýi – mektep (Rýdnichnyi aýylyndaǵy mektepti qosa alǵanda), sondai-aq densaýlyq saqtaý jáne sý sharýashylyǵy nysandary bar.
