Taldyqorǵanda aqyn, uly oishyl Abai Qunanbaiulynyń eskertkishine gúl shoqtaryn qoiý rásimi ótti. Is-sharaǵa Jetisý oblysynyń ákimi Beibit Isabaev, ziialy qaýym ókilderi, mádeniet jáne óner qairatkerleri, ardagerler, jastar men qala turǵyndary qatysty. Abai kúni aiasynda óńirde 119 túrli mádeni-aǵartýshylyq is-shara uiymdastyryldy, dep habarlaidy dalanews.kz.
«Abai – danalyqtyń dara shyńy» atty saltanatty is-shara 2023 jyly Abai eskertkishi ornatylǵan B. Rimova atyndaǵy Akademiialyq drama teatry aldyndaǵy alańda ótti. Gúl shoqtaryn qoiý rásiminen bastalǵan shara jas Abai men kemel Abaidyń kezdesýin beinelegen teatrlandyrylǵan prologpen jalǵasty. Onda kemel Abai óziniń jas shaǵyndaǵy beinesine adamnyń kórki – onyń bilimi, ózin-ózi jetildirýi jáne halqyna qyzmet etýinde ekenin ósiet etti.
Kesh barysynda «Mizam» kóshpeli ádebi mektebiniń oqýshylary Abaidyń óleńderin mánerlep oqydy. Jas qatysýshylardyń áserli oryndaýy keshtiń eń jyly sátteriniń birine ainalyp, Abai poeziiasynyń jas urpaqtyń júreginen áli de oryn alyp kele jatqanyn kórsetti.
Baǵdarlamanyń erekshe bóliginiń biri mýzykalyq bólim boldy. Jergilikti ónerpazdar Abaidyń «Kózimniń qarasy», «Jelsiz túnde jaryq ai» jáne basqa da ánderin oryndap, kórermenderge onyń mýzykalyq murasynyń kórkemdigi men tereńdigin jetkizdi.
– Keshtiń ashyq aspan astynda ótip, oǵan kez kelgen adamnyń qatysa alatyny maǵan óte unady. Ózim ómir boiy mektepte qazaq tili men ádebieti pániniń muǵalimi bolyp jumys istedim. Sondyqtan bul kesh maǵan erekshe áser etti. Bilim, eńbek, ádildik, adamgershilik jáne rýhani kemeldený qundylyqtaryna negizdelgen Abai shyǵarmashylyǵy búgin de ózektiligin joǵaltqan joq. Sondyqtan osyndai is-sharalar onyń adamgershilik jáne filosofiialyq ideialarynyń mańyzyn taǵy bir márte eske salady, – dep pikirimen bólisti oblys ortalyǵynyń turǵyny, zeinetker Daniia Jaqypova.
Onyń pikirin qalanyń jas býyn ókili de qoldady:
– Men Abaidyń óleńderimen sýsyndap óstim. Eseigen soń da olardy oqýdy jalǵastyryp kelemin. Óitkeni ár jasta onyń shyǵarmalarynan jańa mán tabasyń. Búginde de onyń óleńderi men qara sózderi ózektiligin joǵaltqan joq. Abai – bizdiń máńgilik muramyz. Ony bilý, qurmetteý jáne óskeleń urpaq arasynda keńinen nasihattaýymyz qajet, – dedi Janat Sanatuly.
Oblystyq mádeniet, arhivter jáne qujattama basqarmasynyń basshysy Qýanysh Súleimenov búgin oblystyń kitaphanalarynda Ashyq esik kúni uiymdastyrylǵanyn atap ótti. Kitaphanalar kelýshiler úshin túngi saǵat 00:00-ge deiin jumys istep, túrli rýhani-aǵartýshylyq jáne mádeni-tanymdyq baǵdarlamalardy usynýda.
Jalpy, 1-10 tamyz aralyǵynda Abai kúnine orai Jetisý oblysynda 119 is-shara ótkizildi.
