Tatarstanda bolǵan jantúrshigerlik jol apatynan alty adam qaza tapty. Aldyn ala aqparat boiynsha, kólikte 15-16 jastaǵy jasóspirimder bolǵan, dep habarlaidy dalanews.kz.
Qaiǵyly oqiǵa Zelenodolsk qalasynda bolǵan. Jolaýshylar mingen jeńil kólik aǵashqa soǵylyp, artynsha órtenip ketken.
Apattan 15 jastaǵy jasóspirim ǵana aman qaldy. Ol denesiniń 30 paiyzy kúiip, aýrýhanaǵa jetkizilgen. Bala esin biledi, alaida aýyr kúizeliste bolǵandyqtan, kólikti kim basqarǵanyn ázirge aita almaǵan.
Qaza tapqandardyń deneleri qatty kúiip ketken. Osyǵan bailanysty olardyń jeke basyn anyqtaý úshin genetikalyq saraptama júrgiziledi.
Tatarstan prokýratýrasynyń málimetinshe, jol apaty 24 shildege qaraǵan túni Zelenodolsk qalasyndaǵy Voljskaia kóshesinde bolǵan. Júrgizýshi men bes jolaýshy alǵan jaraqattarynan oqiǵa ornynda kóz jumǵan.
Oqiǵanyń barlyq mán-jaiyn anyqtaý úshin apat ornyna Zelenodolsk qalasynyń prokýrory Dmitrii Erpelev barǵan. Tekserý barysy qadaǵalaý organynyń baqylaýyna alyndy.
Jol qozǵalysy erejesin buzý saldarynan adamdardyń qaza tabýyna bailanysty Resei Qylmystyq kodeksiniń 264-babynyń 5-bóligi boiynsha qylmystyq is qozǵaldy.
Keiin quqyq qorǵaý organdary kólikti júrgizýshi kýáligi joq 30 jastaǵy er adam basqarǵanyn habarlady.
Qazir jergilikti turǵyndar apat ornyna gúl shoqtaryn ákelip, qaza tapqandardyń týystaryna kóńil aityp jatyr.
