Ýkraına basshysy Vladımır Zelenskıı Reseı prezıdenti Vladımır Pýtınmen Qazaqstanda kezdesýge ázir ekenin málimdedi, dep habarlaıdy Dalanews.kz.
"Onyń (Pýtınniń – Dalanews) tańdaýy bar. Tramptyń da komandasy, meniń de komandam, eýropalyq kóshbasshylar, sonyń ishinde Makron jáne basqalary, sondaı-aq Túrkıa prezıdenti Erdoǵan da - barlyǵymyz kezdesýdi Túrkıada, Saýd Arabıasynda, Katarda nemese beıtarap Eýropada, mysaly, Avstrıada, Shveısarıada ótkizýdi usyndyq. Sondyqtan biz: “Qalasańyzdar, Qazaqstan sıaqty jerde de kezdesýge bolady” dep aıttyq", – dedi Zelenskıı sársenbi kúni Fox News arnasyna bergen suhbatynda.
Ol dál qazir Reseı kóshbasshysymen kezdesýge daıyn ekenin atap ótti.
"Men ony Kıevke shaqyrǵan joqpyn. "Eger siz menimen kezdeskińiz kelmese, árıne, óz tarapyńyzdan meni Máskeýge shaqyrasyz. Bul tek kezdesýdi keıinge qaldyrý úshin jasalatyn áreket qana” dedim. Bul – men ony Kıevke shaqyrǵanymmen birdeı nárse", – dep túsindirdi Zelenskıı.
Aıta keteıik, buǵan deıin Ýkraına prezıdenti Vladımır Zelenskıı Reseı prezıdenti Vladımır Pýtınniń Máskeýde beıbit kelissózder júrgizý týraly usynysyn qabyldamaı, ony Kıevke shaqyrǵan edi. Bul týraly ol ABC News arnasyna bergen suhbatynda aıtty.
"Ol Kıevke kele alady. Eger adam soǵys kezinde kezdeskisi kelmese, ol árıne, men úshin de, basqalar úshin de qabyldaı almaıtyn nárseni usynady. Bul - men oǵan Kıevke kelýin usynǵanymmen birdeı", – dedi Ýkraına prezıdenti.
Zelenskııdiń pikirinshe, Pýtın mundaı usynysty kezdesý ýaqytyn keıinge shegerý úshin jasaǵan.
Ýkraına basshysy, sonymen birge, eli kún saıyn zymyran shabýylyna jáne túrli soqqylarǵa ushyrap jatqan kezde Máskeýge bara almaıtynyn aıtyp, Pýtınniń muny "jaqsy túsinetinin" jetkizdi.
Eske salaıyq, Pýtın 3 qyrkúıekte Qytaıǵa jasaǵan saparynan keıin Zelenskıımen kelissózderdi Reseı astanasynda ótkizýge daıyn ekenin málimdegen edi. Eki kúnnen soń Shyǵys ekonomıkalyq forýmynda sóılegen sózinde Reseı prezıdenti Máskeýdiń "joǵarǵy deńgeıdegi kelissózder úshin eń qolaıly oryn" ekenin taǵy da atap ótti.
