Qazaqstanda jumyspen qamtýdyń tsifrlyq ádisi engizilip jatyr. Bul týraly Úkimet otyrysynda eńbek jáne halyqty áleýmettik qorǵaý ministri Asqarbek Ertaev málimdedi, dep habarlaidy dalanews.kz.
Jańa modeldiń negizgi qaǵidaty mynadai: adam jumysty izdemeidi, jumys adamdy ózi tabady.
Júie jumys berýshilerdiń ótinishi negizinde jumysqa muqtaj azamattardy avtomatty túrde anyqtaidy. Sodan keiin olarǵa eGov jáne Enbek.kz mobildi qosymshalary arqyly nemese 1414 nómirinen tiisti habarlamalar jiberedi.
Jasandy intellekt azamattyń jeke erekshelikterin eskere otyryp, óńir ishinde de, odan tys jerde de jumys oryndaryn irikteidi. Sonymen qatar, azamattarǵa oqytý kýrsynan ótý jáne qaita daiarlaý, qonys aýdarý múmkindikterin usynady.
Shildede servis Pavlodar oblysynda engizilgen. Jumysqa ornalastyrý boiynsha 39 myń habarlama jiberilgen. Bul kezeńde óńirde 962 adam jumysqa ornalasqan. Qyrkúiekte servisti Mańǵystaý oblysynda engizý josparlanyp otyr. Jyl sońyna deiin servis elimizdiń barlyq 20 óńirine aýqymdy túrde engiziledi.
