Qazaqstanda jasandy intellektini bilim berý júiesine engizý máselesi kún tártibindegi ózekti taqyryptardyń birine ainaldy, dep habarlaidy dalanews.kz.
Bul týraly «Taldaý» ulttyq zertteýler jáne bilimdi baǵalaý ortalyǵy» AQ basqarma tóraǵasynyń orynbasary Almathan Qýanyshkereev málimdedi.
Onyń aitýynsha, biyl Astanada ótken Eýraziialyq ekonomikalyq forýmda «Jahandyq tsifrlyq básekedegi EAEO: jasandy intellektige basymdyq berý» taqyryby talqylanǵan. Bul másele Qazaqstan úshin de erekshe mańyzǵa ie. Óitkeni 2026 jyl elimizde Tsifrlandyrý jáne jasandy intellekt jyly bolyp jariialanyp, jýyrda Memleket basshysy jasandy intellektini orta bilim berý júiesine engizý týraly jarlyqqa qol qoiǵan.
Sarapshy jasandy intellektiniń bilim berý salasyndaǵy áleýeti joǵary ekenin atap ótti. Onyń pikirinshe, tehnologiia oqytýdy jekelendirýge, muǵalimderdiń jumysyn jeńildetýge, oqýshylardyń bilimindegi olqylyqtardy anyqtaýǵa jáne sapaly oqý materialdaryna qoljetimdilikti arttyrýǵa múmkindik beredi.
Sonymen qatar ol jasandy intellektini tek tehnologiia úshin engizý durys emes ekenin aitty. Bilim berý salasynda qateliktiń quny joǵary bolǵandyqtan, balalardyń múddesi, jeke derekterdiń qaýipsizdigi, bilim sapasy, akademiialyq adaldyq jáne muǵalimniń róli basty nazarda bolýy qajet ekenin jetkizdi.
Almathan Qýanyshkereevtiń sózinshe, retteý tetikteri, biryńǵai tásilder men túsinikti standarttar qaýipsiz damýdyń mańyzdy sharty bolyp sanalady. Ol Qazaqstanda jasandy intellektini pedagogtiń ornyn basatyn qural retinde emes, muǵalimge kómekshi tehnologiia retinde qarastyrý qajet ekenin atap ótti.
Sarapshy tehnologiialardyń adamdy almastyrmai, kerisinshe onyń múmkindikterin kúsheitýi tiis ekenin aitty.
Onyń pikirinshe, jasandy intellektini jaýapkershilikpen damytý máselesi tek Qazaqstan aiasynda ǵana emes, Eýraziialyq ekonomikalyq odaq deńgeiinde de talqylanýy mańyzdy. Óitkeni jasandy intellektini oqshaý túrde damytý múmkin emes. Bul baǵytta tájiribe almasý, retteý, derekterdi qorǵaý, etika jáne praktikalyq qoldaný máseleleri boiynsha ortaq tásilder qajet.
Sarapshy mundai halyqaralyq yntymaqtastyq Qazaqstanda ǵana emes, jalpy óńirde jáne álemde qaýipsiz ári adamǵa baǵdarlanǵan jasandy intellektini damytýǵa yqpal etetinin aitty.
