Japoniia BUU qabyldaǵan jańa álem kartasyna bailanysty qarsylyq bildirip, onda Kýril araldarynyń Resei aýmaǵy retinde kórsetilýine narazylyq tanytty. Bul týraly The Guardian basylymy jazdy, dep habarlaidy dalanews.kz.
Buǵan deiin BUU Bas Assambleiasy álem kartasynyń jańa nusqasyn paidalanýdy qoldaǵan bolatyn. Equal Earth («Teń Jer») proektsiiasymen jasalǵan kartada Japoniia «soltústik aýmaqtar» dep ataityn Kýril araldary Resei territoriiasymen bir túste belgilengen.
Japoniia úkimetiniń ókili Minorý Kihara mundai beineleý eldiń resmi ustanymyna qaishy keletinin málimdedi. Onyń aitýynsha, Tokio diplomatiialyq arnalar arqyly karta jariialanǵan saittyń operatoryna narazylyq joldap, kartany túzetýdi talap etken.
Kihara Japoniia biligi el aýmaǵy men geografiialyq ataýlarǵa qatysty qate túsinikterdiń taralýyna jol bermeýge nietti ekenin aitty. Aita keteiik, Japoniia jańa kartany engizý jónindegi BUU qararyn qoldaǵan 164 memlekettiń qatarynda bolǵan.
Jańa karta dástúrli Merkator proektsiiasyna qaraǵanda qurlyqtardyń naqty kólemin dálirek kórsetý maqsatynda ázirlengen. Sonyń nátijesinde Afrika burynǵy kartalarǵa qaraǵanda áldeqaida úlken kórinse, Eýropa men Soltústik Amerikanyń aýmaǵy salystyrmaly túrde kishirek beinelengen.
Kýril araldary Ekinshi dúniejúzilik soǵystan keiin KSRO quramyna engen. Japoniia Itýrýp, Kýnashir, Shikotan araldary men Kishi Kýril jotasyndaǵy birqatar araldarǵa qatysty talaptaryn saqtap keledi jáne olardy «soltústik aýmaqtarymyz» dep ataidy. Resei bul aýmaqtardy óz jeri dep esepteidi.
13 tamyzda Tokio Resei prezidenti Vladimir Pýtinniń Itýrýp aralyna saparyna bailanysty Reseidiń Japoniiadaǵy elshisi Nikolai Nozdrevke narazylyq bildirgen. Japoniia premer-ministri Sanae Takaiti atalǵan aýmaqtardy tarihi jáne halyqaralyq quqyq turǵysynan Japoniiaǵa tiesili dep sanaitynyn málimdegen.
Óz kezeginde Máskeý Japoniianyń bul áreketin negizsiz dep baǵalady. Al 18 tamyzda Resei Syrtqy ister ministrligi Japoniianyń Máskeýdegi elshisi Akira Mýtony shaqyryp, japon basshylyǵynyń Pýtinniń Itýrýpqa saparyna qatysty málimdemelerine bailanysty narazylyq bildirgenin habarlady.
