Astanada «Jańa adamdar» jáne «Dala qyrandary» qozǵalystary jas kóshbasshylar men sarapshylardyń jańa býynyn daiyndaýǵa arnalǵan «Adal azamat» bilim berý baǵdarlamasyn tanystyrdy, dep habarlaidy Dalanews Kazinform-ǵa silteme jasap.
Joba aiasynda uiymdastyrýshylar jastarǵa ujym qalyptastyrý, strategiialyq josparlaý, sondai-aq BAQ ókilderimen jáne qoǵamdyq uiymdarmen ózara árekettesý boiynsha praktikalyq daǵdylardy úiretýdi kózdeidi.
«Bizde mundai júieni qalai qurý kerektigi boiynsha jinaqtalǵan tájiribe men aiqyn túsinik bar: komandalardy qalai jasaqtaý, strategiialardy qalai jazý, BAQ-pen, jýrnalistermen, qoǵam belsendilerimen qalai jumys isteý qajettigin jaqsy bilemiz. Osy bilimimizdi «Dala qyrandarymen» birlese otyryp, «Adal azamat» bilim berý baǵdarlamasyna biriktirdik», — dep atap ótti «Jańa adamdar» qozǵalysynyń baspasóz hatshysy Alpamys Ábilov.
Joba avtorlarynyń sózinshe, baǵdarlamanyń ózegi – «Is ózimde» kontseptsiiasy. Ol aiyptaýshylardy izdeýge emes, máselelerdiń túpki sebepterin anyqtap, olardy sheshýdiń naqty joldaryn tabýǵa baǵyttalǵan.
