Konstitýtsiiaǵa enetin jańa ózgeristerde «Halyq únine qulaq asatyn memleket», «Zań men tártip», «Taza Qazaqstan» syndy negizgi ideialyq qaǵidattardy normativtik turǵyda bekitý kózdelgen. Bul týraly Konstitýtsiialyq komissiia múshesi, Astana qalasynyń ákimi Jeńis Qasymbek aitty, dep habarlaidy Dalanews.kz
«Ata Zańymyzdaǵy «Zań men tártip» qaǵidaty – Ádiletti Qazaqstan ideiasyn nyǵaitýdyń negizgi sheshimi dep sanaimyn. Búginde álem jurty Qazaqstandy azamattardyń quqyǵy men bostandyqtaryn múltiksiz saqtaýǵa airyqsha basymdyq beretin el dep tanidy. Bul bastama bolashaq urpaq úshin birlik pen yntymaqty, etnos aralyq jáne konfessiia aralyq kelisimdi odan ári saqtaýdyń berik irgetasyna ainalady», – dedi Jeńis Qasymbek Konstitýtsiialyq reformalar komissiiasynyń V otyrysynda.
Elorda ákimi kóptegen elde damýdyń negizgi faktory zań ústemdigi men tártiptiń saqtalýymen bailanysty ekenin atap ótti. Azamattary óziniń zań aldyndaǵy qatań jaýapkershiligin túsinedi jáne zań men tártipke baǵyný mádenietin qatań ustanady. Mundai elder álemdegi eń qaýipsiz memleketterdiń qatarynda, al adamdary memlekettik institýttarǵa tolyqtai senedi.
2023 jyly Memleket basshysy kótergen «Taza Qazaqstan» ideiasy da el azamattarynyń ómir saltyna ainaldy.
«Bul qaǵidatty negizgi postýlattardyń biri retinde engizý – azamattardyń qorshaǵan orta men bolashaq urpaq aldyndaǵy jaýapkershiligin qalyptastyrady. «Taza Qazaqstan» – tek qorshaǵan ortaǵa qamqorlyq qana emes: oi men sózdiń tazalyǵy, is-árekettegi jaýapkershilik, zańǵa jáne qoǵamdyq qundylyqtarǵa degen qurmet, kúndelikti ómirde mádenietti saqtaý degen sóz», – dedi Jeńis Qasymbek.
Sonymen birge, Jeńis Qasymbek ár adamdy qundylyq retinde baǵalaityn «Halyq únine qulaq asatyn memleket» qaǵidasyna da erekshe toqtaldy.
«Jergilikti memlekettik organdar jumysynyń jemisti bolýy – halyqpen júieli bailanysty talap etedi. Tájiribe kórsetkendei turǵyndarmen turaqty jáne konstrýktivti dialog ornatý – aimaqtardy keshendi damytýdaǵy negizgi faktordyń biri. Osyǵan orai atalǵan usynystardyń bekitilýin qoldaimyn», – dedi Jeńis Qasymbek.
