Túrkistan oblysynda mindettemelerin oryndamaǵan 11 jer qoinaýyn paidalanýshynyń kelisimsharttary men litsenziialary merziminen buryn toqtatyldy. Odan bólek, mindettemelerin tolyq oryndamaǵan 38 jer qoinaýyn paidalanýshynyń kelisimshartyn merziminen buryn toqtatý usynysy Oblystyq mamandandyrylǵan tabiǵat qorǵaý prokýratýrasyna joldandy. Bul jumystar oblys ákimi Darhan Satybaldynyń jiti baqylaýynda tur, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Jer qoinaýyn, karerlerdi qoldanýda zań talaptaryn saqtamaǵan kompaniialarǵa qarsy qatań shara qabyldaý kerek. Quqyq qorǵaý organdary tarapynan da batyl áreketter jasalýy tiis. Jaýapty basqarma basshylary, aýdan, qala ákimderi osy baǵytta jumysty kúsheitińizder, – dedi Darhan Satybaldy.
Apparat otyrysynda Oblystyq kásipkerlik jáne ónerkásip basqarmasynyń basshysy Nurjigit Myrzahmetov basqarma tarapynan atqarylyp jatqan jumystardy baiandady. Onyń aitýynsha, oblys aýmaǵyndaǵy iri ózenderi men kólderiniń sý qorǵaý beldeýindegi jáne aýyldar men eldi mekenderdiń aýmaqtaryna jaqyn jerde zańsyz jumys istegen jer qoinaýyn paidalanýshylardyń litsenziialary men kelisimsharttary toqtatyldy. Odan bólek, Sairam aýdany, Qaramurt aýyldyq okrýgi aimaǵynda strategiialyq mańyzy bar «Bý gaz qondyrǵysy qurylysy» ainalasyndaǵy ken oryndarynyń jumysyn toqtatý boiynsha jumystar zańǵa sáikes júrgizilýde.
Zańsyz jer qoinaýyn paidalanyp jatqan qyzyl núkteler boiynsha tiisti shara qabyldaýdy mindettedi. Aýdan, qalalarda zańsyz jer qoinaýyn paidalanýdyń aldyn alý úshin qurylǵan mobildi toptar men ishki ister organdary birlese reidtik jumystardy kúsheitý kerek ekenin aitty.
Jer qoinaýyn paidalanýshylardan óńirdiń áleýmettik-ekonomikalyq damýyna arnalǵan tólemder boiynsha 2023 jyly 1 996, 7 mln teńge tústi. Biylǵa 2,2 mlrd teńge josparlanyp, búginde 897,1 mln teńge túsken. Biylǵy jospar tolyǵymen oryndalady.
Sonymen qatar basqarma tarapynan jer qoinaýyn paidalanýshylardyń zańnamalardy saqtaýy boiynsha baqylaý turaqty júrgizilýde. Nátijesinde, marksheider mamanymen 62 ken orny aýmaǵynan kemshilikter anyqtaldy. Onyń ishinde 17 jer qoinaýyn paidalanýshy óz erkimen zalal shyǵyndaryn ótedi. 4 jer qoinaýyn paidalanýshyǵa qatysty Basqarma tarapynan talap-aryz sotqa joldansa, 41 jer qoinaýyn paidalanýshyǵa qatysty is-qujattar Oblystyq jer resýrstary departamentine joldandy.
Apparat májilisinde zańsyz jer qoinaýyn paidalanýdyń aldyn alý boiynsha Túrkistan oblystyq politsiia departamenti bastyǵynyń mindetin atqarýshy Baǵlanbek Aitbaev baiandama jasady. Jyl basynan oblys boiynsha zańsyz jer qoinaýyn paidalanýdyń jalpy 204 deregi anyqtalǵan. Onyń ishinde, 200 derek boiynsha Ákimshilik kodeksiniń 139-baby (Jer qoinaýyna memlekettik menshik quqyǵyn buzý) arqyly jaýapkershilikke tartý úshin jinaqtalǵan qujattar Ekologiia departamentine joldandy. Ekologiia departamentimen 91 ákimshilik is qaralyp, jalpy 2 mln 234 myń 239 teńge aiyppul salyndy.
Onyń ishinde, óndirilgeni – 2 mln 52 myń 719 teńge. Sonymen qatar 2 ákimshilik is qaitalanǵany úshin sotqa joldanǵan. Qazirgi tańda 107 ákimshilik is qaralýda. Olardyń basym bóligi Saýran, Sairam, Qazyǵurt aýdandaryna tiesili. Jer qoinaýyn óz betinshe paidalaný boiynsha 4 derek anyqtalyp, sotqa deiingi tergeý júrgizilýde. Budan bólek, arnaiy turaqqa 178 júk kóligi jáne 43 tehnika qoiyldy.
Jer qoinaýyn paidalanýda týyndaǵan máselelerdi retteý jáne qylmystyq isterdi sotqa joldaý úshin múddeli memlekettik organdarmen jumys algoritmi jasaldy. Jer qoinaýyn zańsyz paidalanýshylarmen kúres jumystary kúsheitiledi.
Aita keteiik, búginde Túrkistan oblysynda keń taralǵan paidaly qazbalardy óndiretin 191 jer qoinaýyn paidalanýshy bar. Olar 80 kelisimshart jáne 111 litsenziia negizinde jumys isteidi.
