Búgin Almatyda Almaty Museum of Arts pen Halyk Bank arasynda Qazaqstandaǵy zamanaýi ónerdi damytýǵa baǵyttalǵan strategiialyq seriktestik týraly memorandýmǵa qol qoiyldy. Kelisim mádeni jobalardy qoldaýǵa jáne halyqaralyq kórmelerdi júzege asyrýǵa baǵyttalǵan, dep habarlaidy Dalanews.kz.
Bul seriktestik Ortalyq Aziiadaǵy eń iri zamanaýi óner murajaiy men óńirdiń jetekshi qarjy institýtynyń kúshin biriktirip, Qazaqstandaǵy biznes pen mádeni uiymdar arasyndaǵy yntymaqtastyqtyń jańa úlgisin qalyptastyrýdy kózdeidi.
Memorandým aiasynda Halyk Bank biyl Almaty Museum of Arts murajaiynyń negizgi kórmeleri, bilim berý baǵdarlamalary jáne baspa jobalaryna bas seriktes retinde qoldaý kórsetedi. Bul bastama zamanaýi ónerdiń órisin keńeitip, mádeni ómirge qatysý múmkindikterin arttyrýǵa baǵyttalǵan.
Alǵash bolyp sóz alǵan Almaty Museum of Arts negizin qalaýshy Nurlan Smaǵulov murajai ashylǵan sátten bastap ony tek kórme ótetin oryn emes, zamanaýi ónerdi damytatyn iri mádeni ortalyqqa ainaldyrý maqsat etilgenin aitty.
“Murajaidy qurǵan kezde biz onyń tek jeke bastamamen shektelmeitin, qoǵam úshin ashyq ári mańyzdy mádeni institýt bolǵanyn qaladyq. Sondyqtan zamanaýi ónerdiń damýyna shyn máninde beijai qaramaityn seriktesterdi izdedik. Halyk Bank-pen seriktestik – osy joldaǵy mańyzdy qadam”, – dedi Nurlan Smaǵulov.
Onyń aitýynsha, álemniń kóptegen elinde bankter mádeniet pen ónerdi qoldaýǵa belsendi qatysady. Qazaqstanda da mundai tájiribeniń qalyptasýy mańyzdy.
“Biz bul qoldaýdy murajaidyń kúndelikti shyǵyndaryna emes, halyqaralyq kórmeler uiymdastyrýǵa, bilim berý baǵdarlamalaryna jáne mádeni jobalarǵa baǵyttaimyz. Sonyń arqasynda Qazaqstanǵa álemdik deńgeidegi sýretshilerdiń jumystaryn ákelýge múmkindik týady”, – dedi ol.
Smaǵulovtyń aitýynsha, murajai men Halyk Bank arasyndaǵy bailanys burynnan bar jáne eki uiymdy uzaq jyldar boiǵy áriptestik tájiribe biriktiredi.
“Bul – Ortalyq Aziiadaǵy alǵashqy iri jeke zamanaýi óner murajaiy men Qazaqstandaǵy jetekshi banktiń yntymaqtastyǵy. Meniń oiymsha, mundai odaq el mádenieti úshin mańyzdy jańa jobalardyń bastalýyna jol ashady”, – dedi ol.
Al Halyk Bank basqarma tóraiymy Úmit Shaiahmetova bank mádeniet pen bilim salasyna investitsiia salýdy qoǵam aldyndaǵy jaýapkershiliktiń bir bóligi retinde qaraitynyn aitty.
“Halyk Bank uzaq jyldar boiy áleýmettik jáne mádeni jobalardy qoldap keledi. Biz bilim, meditsina, sport jáne óner salalaryna milliardtaǵan teńge bóldik. Al bul murajai – Qazaqstan mádenieti úshin erekshe joba”, – dedi Úmit Shaiahmetova.
Ol mýzeimen alǵash tanysqan kezde erekshe áser alǵanyn da atap ótti.
“Murajaiǵa alǵash kelgende onyń aýqymy men ideiasyna qatty tańǵaldym. Bul jerde úlken ǵimarat qana emes, úlken eńbek, úlken mahabbat bar. Nurlan Smaǵulovtyń bul jobaǵa qanshalyqty jan-tánimen kiriskeni anyq kórinedi”, – dedi ol.
Shaiahmetovanyń aitýynsha, mundai mádeni bastamalar eldiń halyqaralyq bedelin arttyrýǵa yqpal etedi.
“Búginde Almaty Museum of Arts tek Almatynyń ǵana emes, búkil Qazaqstannyń mádeni vizit kartasyna ainalyp keledi. Mundai jobalar elge týristerdi tartady, eń bastysy – jastardyń ónerge qyzyǵýshylyǵyn arttyrady”, – dedi bank basshysy.
Onyń sózinshe, bank úshin murajaidyń bas seriktesi ataný – úlken jaýapkershilik.
“Biz úshin bul – jai demeýshilik emes, eldiń mádeni bolashaǵyna jasalǵan investitsiia. Sondyqtan bul bastamaǵa úlken qýanyshpen qosyldyq”, – dedi Úmit Shaiahmetova.
Shara barysynda Almaty Museum of Arts direktory Tatiana Hodjaeva da sóz sóilep, murajaidyń qysqa ýaqyt ishinde halyqaralyq mádeni keńistikte óz ornyn aiqyndap úlgergenin aitty.
Onyń aitýynsha, murajai 2025 jyldyń qyrkúieginde ashylǵanyna qaramastan, búginge deiin 250 myńnan astam kelýshini qabyldaǵan.
“Murajai esigi ashylǵaly beri biz túrli jastaǵy adamdardy, ártúrli mádeni ortadan kelgen kelýshilerdi qabyldap kelemiz. Bizdiń baǵdarlamalarymyz ónermen alǵash tanysqan adamdarǵa da, kásibi óner qaýymdastyǵyna da qyzyqty. Qysqa ýaqyt ishinde biz Tate jáne Getty Foundation uiymdarymen birlesken jobalardy júzege asyrdyq. Halyk Bank-tiń qoldaýy murajaidyń el mádeni ómirindegi mańyzdy rólin moiyndaýdyń belgisi”, – dedi Tatiana Hodjaeva.
Seriktestik aiasyndaǵy 2026 jyldyń basty jobasy – áigili amerikalyq videoart sheberi Bill Violanyń kórmesi. “Bill Viola: eki dúnie arasy” atty kórme biyl maýsymda ashylady.
Bill Viola – HH ǵasyrdyń sońy men XXI ǵasyrdyń basyndaǵy eń yqpaldy sýretshilerdiń biri. Ol beinejazbany ónerdiń mańyzdy mediýmy retinde jańa deńgeige kótergen avtor retinde tanylǵan. Onyń kórmeleri Niý-Iorktegi MoMA, Londondaǵy Tate, Bilbaodaǵy Guggenheim jáne Parijdegi Centre Pompidou siiaqty álemniń jetekshi mýzeilerinde ótken.
Sonymen qatar is-sharada qazaqstandyq sýretshi Almagúl Meńlibaevanyń “Men bárin túsinemin” atty jobasy tanystyryldy.
Shara aiasynda jýrnalisterge arnaiy tanymdyq ekskýrsiia uiymdastyryldy. Ekskýrsiiany sýretshiniń ózi júrgizip, kórmege qoiylǵan jumystardyń ideialyq mazmuny men kórkemdik erekshelikteri týraly aityp berdi. Avtor óz shyǵarmalarynda tarihi jady, mádeni sáikestik jáne adam bolmysy taqyryptarynyń qalai kórinis tabatynyn túsindirip, týyndylarynyń astaryndaǵy filosofiialyq oilarǵa toqtaldy.
Aita keteiik, Halyk Bank – Qazaqstandaǵy eń iri qarjy institýttarynyń biri. Banktiń jiyntyq aktivteri 20 trln teńgeden asady jáne el ekonomikasynyń naqty sektoryn kreditteýdiń 50 paiyzdan astamy osy bankke tiesili. Keiingi bes jylda bank pen “Halyk” qaiyrymdylyq qory áleýmettik jobalarǵa shamamen 62 mlrd teńge baǵyttaǵan.
Al Almaty Museum of Arts – qazaqstandyq kollektsioner ári metsenat Nurlan Smaǵulov negizin qalaǵan zamanaýi ónerdiń jeke murajaiy. Mádenie oryn 2025 jyldyń kúzinde ashylǵan. Onyń qorynda 700-den astam óner týyndysy bar. Kollektsiiada Aisha Ǵalymbaeva, Salihitdin Aitbaev, Rýstam Halfin jáne Almagúl Meńlibaeva siiaqty qazaqstandyq sýretshilerdiń eńbekterimen qatar, Richard Serra, Iaioi Kýsama, Anselm Kifer jáne Bill Viola siiaqty álemdik óner sheberleriniń týyndylary saqtalǵan.
