بۇگىن الماتىدا Almaty Museum of Arts پەن Halyk Bank اراسىندا قازاقستانداعى زاماناۋي ونەردى دامىتۋعا باعىتتالعان ستراتەگيالىق سەرىكتەستىك تۋرالى مەموراندۋمعا قول قويىلدى. كەلىسىم مادەني جوبالاردى قولداۋعا جانە حالىقارالىق كورمەلەردى جۇزەگە اسىرۋعا باعىتتالعان، دەپ حابارلايدى Dalanews.kz.

بۇل سەرىكتەستىك ورتالىق ازياداعى ەڭ ءىرى زاماناۋي ونەر مۇراجايى مەن ءوڭىردىڭ جەتەكشى قارجى ينستيتۋتىنىڭ كۇشىن بىرىكتىرىپ، قازاقستانداعى بيزنەس پەن مادەني ۇيىمدار اراسىنداعى ىنتىماقتاستىقتىڭ جاڭا ۇلگىسىن قالىپتاستىرۋدى كوزدەيدى.

مەموراندۋم اياسىندا Halyk Bank بيىل Almaty Museum of Arts مۇراجايىنىڭ نەگىزگى كورمەلەرى، ءبىلىم بەرۋ باعدارلامالارى جانە باسپا جوبالارىنا باس سەرىكتەس رەتىندە قولداۋ كورسەتەدى. بۇل باستاما زاماناۋي ونەردىڭ ءورىسىن كەڭەيتىپ، مادەني ومىرگە قاتىسۋ مۇمكىندىكتەرىن ارتتىرۋعا باعىتتالعان.

العاش بولىپ ءسوز العان Almaty Museum of Arts نەگىزىن قالاۋشى نۇرلان سماعۇلوۆ مۇراجاي اشىلعان ساتتەن باستاپ ونى تەك كورمە وتەتىن ورىن ەمەس، زاماناۋي ونەردى دامىتاتىن ءىرى مادەني ورتالىققا اينالدىرۋ ماقسات ەتىلگەنىن ايتتى.

“مۇراجايدى قۇرعان كەزدە ءبىز ونىڭ تەك جەكە باستامامەن شەكتەلمەيتىن، قوعام ءۇشىن اشىق ءارى ماڭىزدى مادەني ينستيتۋت بولعانىن قالادىق. سوندىقتان زاماناۋي ونەردىڭ دامۋىنا شىن مانىندە بەيجاي قارامايتىن سەرىكتەستەردى ىزدەدىك. Halyk Bank-پەن سەرىكتەستىك – وسى جولداعى ماڭىزدى قادام”، – دەدى نۇرلان سماعۇلوۆ.

ونىڭ ايتۋىنشا، الەمنىڭ كوپتەگەن ەلىندە بانكتەر مادەنيەت پەن ونەردى قولداۋعا بەلسەندى قاتىسادى. قازاقستاندا دا مۇنداي تاجىريبەنىڭ قالىپتاسۋى ماڭىزدى.

“ءبىز بۇل قولداۋدى مۇراجايدىڭ كۇندەلىكتى شىعىندارىنا ەمەس، حالىقارالىق كورمەلەر ۇيىمداستىرۋعا، ءبىلىم بەرۋ باعدارلامالارىنا جانە مادەني جوبالارعا باعىتتايمىز. سونىڭ ارقاسىندا قازاقستانعا الەمدىك دەڭگەيدەگى سۋرەتشىلەردىڭ جۇمىستارىن اكەلۋگە مۇمكىندىك تۋادى”، – دەدى ول.

سماعۇلوۆتىڭ ايتۋىنشا، مۇراجاي مەن Halyk Bank اراسىنداعى بايلانىس بۇرىننان بار جانە ەكى ۇيىمدى ۇزاق جىلدار بويعى ارىپتەستىك تاجىريبە بىرىكتىرەدى.

“بۇل – ورتالىق ازياداعى العاشقى ءىرى جەكە زاماناۋي ونەر مۇراجايى مەن قازاقستانداعى جەتەكشى بانكتىڭ ىنتىماقتاستىعى. مەنىڭ ويىمشا، مۇنداي وداق ەل مادەنيەتى ءۇشىن ماڭىزدى جاڭا جوبالاردىڭ باستالۋىنا جول اشادى”، – دەدى ول.

ال Halyk Bank باسقارما ءتورايىمى ءۇمىت شاياحمەتوۆا بانك مادەنيەت پەن ءبىلىم سالاسىنا ينۆەستيسيا سالۋدى قوعام الدىنداعى جاۋاپكەرشىلىكتىڭ ءبىر بولىگى رەتىندە قارايتىنىن ايتتى.

“Halyk Bank ۇزاق جىلدار بويى الەۋمەتتىك جانە مادەني جوبالاردى قولداپ كەلەدى. ءبىز ءبىلىم، مەديسينا، سپورت جانە ونەر سالالارىنا ميللياردتاعان تەڭگە بولدىك. ال بۇل مۇراجاي – قازاقستان مادەنيەتى ءۇشىن ەرەكشە جوبا”، – دەدى ءۇمىت شاياحمەتوۆا.

ول مۋزەيمەن العاش تانىسقان كەزدە ەرەكشە اسەر العانىن دا اتاپ ءوتتى.

“مۇراجايعا العاش كەلگەندە ونىڭ اۋقىمى مەن يدەياسىنا قاتتى تاڭعالدىم. بۇل جەردە ۇلكەن عيمارات قانا ەمەس، ۇلكەن ەڭبەك، ۇلكەن ماحاببات بار. نۇرلان سماعۇلوۆتىڭ بۇل جوباعا قانشالىقتى جان-تانىمەن كىرىسكەنى انىق كورىنەدى”، – دەدى ول.

شاياحمەتوۆانىڭ ايتۋىنشا، مۇنداي مادەني باستامالار ەلدىڭ حالىقارالىق بەدەلىن ارتتىرۋعا ىقپال ەتەدى.

“بۇگىندە Almaty Museum of Arts تەك الماتىنىڭ عانا ەمەس، بۇكىل قازاقستاننىڭ مادەني ۆيزيت كارتاسىنا اينالىپ كەلەدى. مۇنداي جوبالار ەلگە تۋريستەردى تارتادى، ەڭ باستىسى – جاستاردىڭ ونەرگە قىزىعۋشىلىعىن ارتتىرادى”، – دەدى بانك باسشىسى.

ونىڭ سوزىنشە، بانك ءۇشىن مۇراجايدىڭ باس سەرىكتەسى اتانۋ – ۇلكەن جاۋاپكەرشىلىك.

“ءبىز ءۇشىن بۇل – جاي دەمەۋشىلىك ەمەس، ەلدىڭ مادەني بولاشاعىنا جاسالعان ينۆەستيسيا. سوندىقتان بۇل باستاماعا ۇلكەن قۋانىشپەن قوسىلدىق”، – دەدى ءۇمىت شاياحمەتوۆا.

شارا بارىسىندا Almaty Museum of Arts ديرەكتورى تاتيانا حودجايەۆا دا ءسوز سويلەپ، مۇراجايدىڭ قىسقا ۋاقىت ىشىندە حالىقارالىق مادەني كەڭىستىكتە ءوز ورنىن ايقىنداپ ۇلگەرگەنىن ايتتى.

ونىڭ ايتۋىنشا، مۇراجاي 2025 جىلدىڭ قىركۇيەگىندە اشىلعانىنا قاراماستان، بۇگىنگە دەيىن 250 مىڭنان استام كەلۋشىنى قابىلداعان.

“مۇراجاي ەسىگى اشىلعالى بەرى ءبىز ءتۇرلى جاستاعى ادامداردى، ءارتۇرلى مادەني ورتادان كەلگەن كەلۋشىلەردى قابىلداپ كەلەمىز. ءبىزدىڭ باعدارلامالارىمىز ونەرمەن العاش تانىسقان ادامدارعا دا، كاسىبي ونەر قاۋىمداستىعىنا دا قىزىقتى. قىسقا ۋاقىت ىشىندە ءبىز Tate جانە Getty Foundation ۇيىمدارىمەن بىرلەسكەن جوبالاردى جۇزەگە اسىردىق. Halyk Bankء-تىڭ قولداۋى مۇراجايدىڭ ەل مادەني ومىرىندەگى ماڭىزدى ءرولىن مويىنداۋدىڭ بەلگىسى”، – دەدى تاتيانا حودجايەۆا.

سەرىكتەستىك اياسىنداعى 2026 جىلدىڭ باستى جوباسى – ايگىلى امەريكالىق ۆيدەوارت شەبەرى بيلل ۆيولانىڭ كورمەسى. “بيلل ۆيولا: ەكى دۇنيە اراسى” اتتى كورمە بيىل ماۋسىمدا اشىلادى.

بيلل ۆيولا – حح عاسىردىڭ سوڭى مەن XXI عاسىردىڭ باسىنداعى ەڭ ىقپالدى سۋرەتشىلەردىڭ ءبىرى. ول بەينەجازبانى ونەردىڭ ماڭىزدى مەديۋمى رەتىندە جاڭا دەڭگەيگە كوتەرگەن اۆتور رەتىندە تانىلعان. ونىڭ كورمەلەرى نيۋ-يوركتەگى MoMA، لوندونداعى Tate، بيلباوداعى Guggenheim جانە پاريجدەگى Centre Pompidou سياقتى الەمنىڭ جەتەكشى مۋزەيلەرىندە وتكەن.

سونىمەن قاتار ءىس-شارادا قازاقستاندىق سۋرەتشى الماگۇل مەڭلىبايەۆانىڭ “مەن ءبارىن تۇسىنەمىن” اتتى جوباسى تانىستىرىلدى.

شارا اياسىندا جۋرناليستەرگە ارنايى تانىمدىق ەكسكۋرسيا ۇيىمداستىرىلدى. ەكسكۋرسيانى سۋرەتشىنىڭ ءوزى جۇرگىزىپ، كورمەگە قويىلعان جۇمىستاردىڭ يدەيالىق مازمۇنى مەن كوركەمدىك ەرەكشەلىكتەرى تۋرالى ايتىپ بەردى. اۆتور ءوز شىعارمالارىندا تاريحي جادى، مادەني سايكەستىك جانە ادام بولمىسى تاقىرىپتارىنىڭ قالاي كورىنىس تاباتىنىن ءتۇسىندىرىپ، تۋىندىلارىنىڭ استارىنداعى فيلوسوفيالىق ويلارعا توقتالدى.

ايتا كەتەيىك، Halyk Bank – قازاقستانداعى ەڭ ءىرى قارجى ينستيتۋتتارىنىڭ ءبىرى. بانكتىڭ جيىنتىق اكتيۆتەرى 20 ترلن تەڭگەدەن اسادى جانە ەل ەكونوميكاسىنىڭ ناقتى سەكتورىن كرەديتتەۋدىڭ 50 پايىزدان استامى وسى بانككە تيەسىلى. كەيىنگى بەس جىلدا بانك پەن “Halyk” قايىرىمدىلىق قورى الەۋمەتتىك جوبالارعا شامامەن 62 ملرد تەڭگە باعىتتاعان.

ال Almaty Museum of Arts – قازاقستاندىق كوللەكسيونەر ءارى مەسەنات نۇرلان سماعۇلوۆ نەگىزىن قالاعان زاماناۋي ونەردىڭ جەكە مۇراجايى. مادەنيە ورىن 2025 جىلدىڭ كۇزىندە اشىلعان. ونىڭ قورىندا 700-دەن استام ونەر تۋىندىسى بار. كوللەكسيادا ايشا عالىمبايەۆا، ساليحيتدين ايتبايەۆ، رۋستام حالفين جانە الماگۇل مەڭلىبايەۆا سياقتى قازاقستاندىق سۋرەتشىلەردىڭ ەڭبەكتەرىمەن قاتار، ريچارد سەررا، ءياوي كۋساما، انسەلم كيفەر جانە بيلل ۆيولا سياقتى الەمدىك ونەر شەبەرلەرىنىڭ تۋىندىلارى ساقتالعان.