Almatyda qala ákiminiń orynbasary Abzal Núkenovtiń «Taldaý mektebi. Almaty» bilim berý jobasynyń qatysýshylarymen kezdesýi ótti. Narxoz Business School alańynda ótken ashyq dialogtyń negizgi taqyryby jastar arasynda zamanaýi qoǵamdyq qundylyqtardy qalyptastyrý, resýrstarǵa jaýapkershilikpen qaraýdy tárbieleý, únemshildik qaǵidattaryn ilgeriletý jáne ysyrapshyldyqty qabyldamaý, sondai-aq Qazaqstan Respýblikasy Prezidentiniń «Adal azamat», «Taza Qazaqstan» jáne «Zań men tártip» bastamalaryn júzege asyrý boldy, dep habarlaidy dalanews.kz.
Kezdesýge taldaý mektebiniń túlekteri, ǵylymi qaýymdastyqtyń, joǵary oqý oryndarynyń, biznes pen qoǵamdyq uiymdardyń ókilderi qatysty. Qatysýshylar jańa býynnyń jas kóshbasshysy qandai bolýy kerek jáne memlekettik sheshimder qabyldaýda taldaýdyń róli qandai degen máselelerdi talqylady.
Kezdesýdi ashqan Almaty qalasy ákiminiń orynbasary Abzal Núkenov búginde memlekettiń tabysy tek ekonomikalyq kórsetkishtermen ǵana emes, adami kapitaldyń sapasymen, bilim deńgeiimen jáne azamattardyń jaýapkershiligimen aiqyndalatynyn atap ótti.
«Taldaý mektebi. Almaty» — bul jai ǵana bilim berý baǵdarlamasy emes. Bul derekterge negizdelgen sheshim qabyldaý mádenietin qalyptastyratyn, kásibi taldamalyq qaýymdastyqty damytatyn jáne Almatynyń ózekti máseleleri boiynsha praktikalyq usynystar ázirleitin biregei alań», — dep atap ótti Abzal Núkenov.
Onyń aitýynsha, Memleket basshysy aiqyndaǵan qundylyqtar búginde qalanyń jastar saiasatynyń negizine ainalyp otyr. «Adal azamat», «Taza Qazaqstan» jáne «Zań men tártip» qaǵidattary «Jasyl el», «Eko-reindjerler», «Azamat», «NarkoSTOP», óńirlik ǵylymi granttar jáne «Jastardyń qatysý biýdjeti» jobalarynda kórinis tabýda. Bul bastamalar arqyly jastar qoǵamdyq ózgeristerdiń syrttai baqylaýshysy emes, belsendi qatysýshysyna ainalyp keledi.
Kezdesý barysynda ideologiialyq qundylyqtarǵa erekshe nazar aýdaryldy. Science Hub ediýkeitory Gúldana Mámbetova «Adal azamat» tujyrymdamasy volonterlik, zertteý qyzmeti, bilim berý jáne jeke jaýapkershilik arqyly jastardyń kúndelikti mádenietiniń bir bóligine ainalýy tiis ekenin aitty.
«Ádiletti Qazaqstan eń aldymen mádenietti, bilimdi, jaýapty jáne adal azamattardan bastalady», — dedi ol.
Ál-Farabi atyndaǵy QazUÝ-dyń Quqyq ústemdigi jáne jasandy intellekt ortalyǵynyń direktory Dana Baitýqaeva «Zań men tártip» qaǵidatyn búginde taldaýsyz jáne derekterge negizdelgen sheshimdersiz júzege asyrý múmkin emestigin atap ótti. Onyń aitýynsha, zamanaýi tehnologiialar problemalardy sheshýge ǵana emes, olardyń aldyn alýǵa da qyzmet etýi tiis.
Qazirgi jastardyń qundylyq baǵdarlary týraly IT-kásipker Aibolat Qulatai da pikir bildirdi. Onyń oiynsha, tsifrlyq dáýir joǵary oqý oryndarynan tek bilikti mamandardy ǵana emes, áleýmettik jaýapkershiligi joǵary azamattardy tárbieleýdi talap etedi.
Kezdesý sońynda qatysýshylar «Taldaý mektebi. Almaty» jobasy kásibi bilimdi jaýapkershilik, ádilettilik jáne qoǵamǵa qyzmet etý qundylyqtarymen ushtastyratyn jas sarapshylardyń jańa býynyn qalyptastyratyn alańǵa ainalyp kele jatqanyn atap ótti. Bolashaqta dál osyndai mamandar Almatynyń turaqty damýyna jáne eldiń strategiialyq baǵytyn júzege asyrýǵa yqpal etetin sheshimder qabyldai alady.
