Májilis depýtaty Rinat Zaitov jalǵan aqparat taratýǵa qatysty ister boiynsha jaýapqa tartylyp jatqan azamattardy amnistiiaǵa iliktirýge shaqyrdy. Bul týraly ol sársenbi kúni Májilis otyrysynda aitty, dep habarlaidy dalanews.kz.
Depýtattyń sózinshe, jumys tobynyń otyrystarynda kóptegen usynystar aitylǵanymen, olardyń barlyǵy birdei qoldaý tappaǵan.
«Jumys tobynyń otyrystary barysynda kóptegen pikir aittyq, birqatar usynystar engizdik. Ókinishke qarai, olardy qoldaǵan quzyrly organdar tabylmady. Degenmen biz óz tarapymyzdan áreket ettik. Qazir naqty qandai baptar nemese kimder týraly sóz bolǵanyn tizbeleýdiń qajeti joq. Bul zań jobasyn talqylaýǵa qatysýshy retinde meniń mindetim – osynda otyrǵan áriptesterime ótinish aitý», – dedi Zaitov.
Ol Qazaqstandaǵy yqpaldy parlament qaǵidatyna toqtalyp, bul Prezident bedelin halyqaralyq arenada kórsetýge múmkindik ekenin aitty.
«Qazaqstanda yqpaldy parlament qaǵidaty bar. Yqpaldy parlament – kúshti prezidenttiń faktorlarynyń biri. Dál qazir halyqaralyq deńgeide Prezidenttiń bedelin kórsetetin múmkindik týyp otyr. Sondyqtan qurmetti áriptester, meniń jalǵyz ótinishim – mas kúiinde quqyq buzǵandarǵa nemese basqa sanattarǵa emes. Bizde áleýmettik jelidegi pikirleri úshin sottalyp jatqan adamdar bar. Barshańyzdy birigip, ásirese Qylmystyq kodekstiń 274-baby boiynsha ótip jatqan azamattardy amnistiiaǵa engizýge shaqyramyn», – dedi depýtat.
Aita keteiik, Qazaqstan Respýblikasy Qylmystyq kodeksiniń 274-baby – kórineý jalǵan aqparat taratýǵa qatysty.
