Túrkistan oblysynda balalar mingen shaǵyn avtobýstyń apatqa ushyraýy jáne Almatydaǵy ál-Farabi dańǵylynda bolǵan jol-kólik oqiǵasy qoǵamda úlken rezonans týdyrdy. Osyǵan bailanysty Dalanews.kz tilshisi zańger Aigúl Orynbekpen suhbattasyp, mundai atyshýly ister boiynsha júrgizýshilerdi qandai jaza kútip turǵanyn, jábirlenýshi taraptyń keshirim berýi úkimge qalai áser etetinin jáne kámeletke tolmaǵandardyń qaza bolýy jaýapkershilikti qanshalyqty aýyrlatatynyn anyqtap kórdi.
Zańgerdiń aitýynsha, atalǵan ister boiynsha jaza jol apatynyń saldaryna jáne júrgizýshiniń jaǵdaiyna bailanysty belgilenedi.
“Eger júrgizýshi mas bolmasa jáne jol apaty saldarynan bir adam qaitys bolsa, oǵan bes jylǵa deiin bas bostandyǵynan aiyrý jazasy taǵaiyndalýy múmkin. Al eki nemese odan da kóp adam kóz jumsa, jaza bes jyldan on jylǵa deiin ulǵaiady. Eger júrgizýshiniń mas kúide bolǵany anyqtalsa, jaýapkershilik odan ári kúsheiedi. Mundai jaǵdaida on jylǵa deiin bas bostandyǵynan aiyrylyp, ómir boiyna kólik júrgizý quqyǵynan aiyrylýy múmkin”, – deidi Aigúl Orynbek.
Onyń sózinshe, jol apaty saldarynan kámeletke tolmaǵandardyń qaza bolýy da sot úkimine áser etedi.
“Zań boiynsha eki nemese odan kóp adamnyń qaitys bolýy eń aýyr sanktsiia qarastyrylǵan bappen saralanady. Marqumdardyń bala bolýy da sottyń jaza taǵaiyndaý kezinde eskeretin mán-jailarynyń biri. Tájiribede mundai jaǵdailarda sottar qatańyraq jaza qoldanýǵa beiim keledi”, – deidi Orynbek.
Sonymen qatar zańger Túrkistan oblysyndaǵy jaǵdai boiynsha tek júrgizýshiniń ǵana emes, balalardyń jolǵa shyǵýyn uiymdastyrǵan tulǵalardyń jaýapkershiligi de qarastyrylýy múmkin ekenin atap ótti.
Onyń aitýynsha, sot úkim shyǵarǵan kezde júrgizýshiniń kinásin moiyndaýy, jasaǵan áreketine ókinýi, buryn sottalmaǵany jáne jábirlenýshi tarapqa materialdyq kómek kórsetýi siiaqty jaittardy nazarǵa alady. Al jyldamdyqty shamadan tys asyrý nemese kólikti mas kúide basqarý jaýapkershilikti aýyrlatatyn mán-jailarǵa jatady.
Zańger jábirlenýshi taraptyń keshirim berýi qylmystyq jaýapkershilikten tolyq bosatpaitynyn da aitty.
“Buryn keibir ister taraptardyń tatýlasýyna bailanysty toqtatylatyn. Alaida qazir adam ólimine ákelgen jol-kólik oqiǵalary boiynsha mundai múmkindik joq. Marqumdardyń týystary keshirim berip, eshqandai talap qoimaitynyn aitqan kúnniń ózinde qylmystyq is toqtatylmaidy. Bul jaǵdai tek jaza merzimin belgileý kezinde jeńildetetin mán-jai retinde ǵana eskerilýi múmkin”, – deidi ol.
Aitýynsha, mundai isterde sot eń aldymen jol apatynyń naqty mán-jaiyn, kinániń deńgeiin, júrgizýshiniń áreketin jáne saldardyń aýyrlyǵyn jan-jaqty baǵalaidy.
Eske salaiyq, 22 sáýir kúni Túrkistan oblysyndaǵy Arys – Shardara tasjolynda qaiǵyly jol-kólik oqiǵasy boldy. Aldyn ala málimet boiynsha, Maqtaaral aýdanynan voleibol jarysyna bara jatqan mektep oqýshylary mingen Chevrolet Cobalt kóligi KamAZ júk kóligimen soqtyǵysqan. Saldarynan úsh jasóspirim oqiǵa ornynda kóz jumyp, jattyqtyrýshy men taǵy bir oqýshy aýrýhanaǵa jetkizilgen. Politsiia balalardy tasymaldaý týraly quzyrly organdarǵa aldyn ala habar berilmegenin málimdep, oqiǵaǵa bailanysty qylmystyq is qozǵady.
Al Almatydaǵy ál-Farabi dańǵylynda bolǵan jol apaty 21 naýryzǵa qaraǵan túni tirkelgen. Tergeý málimetinshe, Zeekr kóliginiń júrgizýshisi qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Apat saldarynan Mercedes júrgizýshisi men eki jolaýshysy oqiǵa ornynda qaza tapty. Qazirgi ýaqytta is sotta qaralyp jatyr. Sońǵy sot otyrystarynda jábirlenýshi tarap ókilderiniń aiyptalýshyǵa keshirim bergeni jáne oǵan talap-aryzdarynyń joq ekeni belgili boldy.
