Izrail áýe kúshteriniń Irannyń iadrolyq nysandaryn atqylaýy aiasynda munai baǵasy sharyqtai jóneldi. Baǵa birden 11,6% ústemeledi. ICE qor birjasynyń málimetinshe, Brent markaly munaidyń bir barreli 77,36 dollar boldy. Al jarty saǵat burynǵy baǵa 78,5 dollarǵa deiin joǵarylasa, odan bir saǵat buryn 75,6 dollar bolǵan edi, dep habarlaidy Dalanews.kz.
Buǵan deiin Izrail Irannyń Tabriz qalasyndaǵy munai óńdeý zaýytyna (MÓZ) áýeden soqqy bergeni habarlanǵan. Zaýyt jabdyqtary búlingeni belgili, zardap shekkender týraly málimet joq. Sondai-aq, IRNA memlekettik agenttigi birneshe saǵat buryn ýran óndiriletin Natanz qalasyndaǵy Ahmadi Roshan mekemesinde jarylys bolǵanyn habarlady. Iran teledidarynyń habarlaýynsha, aýaǵa radioaktivti shyǵaryndylardyń taralý belgileri anyqtalǵan joq.
Izrail armiiasy túnde Irannyń iadrolyq jáne zymyrandyq baǵdarlamalaryna ziian keltirýge baǵyttalǵan "Am KeLavi" ("Arystan ult") operatsiiasyn bastaǵanyn jariialady.
Jalpy, AQSh pen Iran qarym-qatynasy shielenisi tússe, munai tasymalyna qaýip tónip, baǵa kóterile beretini boljanǵan. Sarapshylardyń sońǵy boljamy boiynsha, mundai jaǵdaida munaidyń bir bareliniń quny 80 dollarǵa deiin kóterilýi múmkin.
