Izrail men HAMAS toby araaǵaiyn elder arqyly Gazada atysty ýaqytsha toqtatyp,kepildikke alynǵan adamdardyń barlyǵyn bosatý boiynsha kelisimge kelýge taiaý, – dep habarlaidy The New York Times basylymy.
Mundai aqparat Izraildiń arnaiy qyzmeti, AQSh ortalyq barlaý qyzmeti, HAMAS-pen bailanys ornatqan Katar jáne Mysyr ókilderi qatysatyn Parijdegi kelissóz qarsańynda shyǵyp otyr. HAMAS-ty EO, AQSh terroristik uiym tanyǵan.
2023 jyly 7 qazanda HAMAS Izraildiń ońtústigine iri shabýyl jasap, sonyń saldarynan 1200-den astam adam qaza bolǵan. Sodan beri Izrail Gaza sektoryna soqqy jasap jatyr.
Palestina jaǵynyń aitýynsha, Izrail operatsiiasynyń nátijesinde Gazada 26 myńnan astam adam opat bolǵan, turǵyndardyń basym bóligi úilerin tastap shyǵýǵa májbúr bolǵan. Izrailde kepildikke alǵan júzden astam adamdy HAMAS áli kúnge deiin bosatqan joq.
The New York Times málimetinshe, atysty toqtatý boiynsha kelisim jobasynyń jazbasha nusqasy ázirlengen. Ol kepildiktegi adamdardy birtindep bosatyp, áskeri qimyldardy shamamen eki aiǵa toqtatýdy qarastyrady. Muny basylymǵa aty-jónin aitpaǵan kelissózden habardar Amerika sheneýnigi aitqan.
Olar taraptar arasynda áli de iri qaishylyqtar baryn moiyndaidy, alaida araaǵaiyn elder aldaǵy eki apta ishinde taraptar kelisimge kelýi múmkin deidi.
The Wall Street Journal derekkózi de mundai kelisim jobasy baryn rastaidy. Alaida basylymnyń jazýynsha, birinshi kezeńde másele atysty alty aptaǵa toqtatý jóninde bolyp otyr. Bul kezde tutqynda otyrǵan áielder, balalar men qarttar bosatylýy tiis. Izrail óz kezeginde palestinalyq tutqyndardyń bir bóligin túrmeden bosatady.
Ekinshi kezeńde HAMAS tutqynda otyrǵan áskeri qyzmetkerlerdi bosatyp, Izrailge ólgen azamattardyń máiitin tapsyrýǵa tiis. Gaza sektorynda turaqty túrde beibitshilik saqtaý týraly kelisim bolady, oǵan ózgelermen qatar AQSh ta kepildik beredi.
Alaida Izrail buǵan deiin Gaza HAMAS baqylaýynda qalsa, mundai shartqa kónbeitinin aitqan.
Kelissózdiń ótýine AQSh yqpal etip jatyr dep aitylady. Juma kúni AQSh prezidenti Djo Baiden máseleni Egipet jáne Katar basshylarymen telefon arqyly talqylaǵan.
Beibitshilik kelissóz týraly aqparattarǵa qaramastan Gaza sektorynda áskeri qimyldar báseńdegen joq. Aqparatqa qaraǵanda, Izrail áskeri Gaza sektorynyń ońtústigindegi Han-Iýnis qalasyn qorshap, HAMAS-qa qatysy bar nysandarǵa soqqy jasady. Keiingi kúnderi myńdaǵan palestinalyq qaladan ketken.
