Izrail elshisi túrkistandyq oqýshylarǵa on noýtbýk syiǵa tartty
Túrkistan oblysynda is-saparda júrgen Izraildiń QR Tótenshe jáne Ókiletti elshisi Liat Vekselman jumys barysynda Túrkistan qalasyndaǵy Maishai Ábenova atyndaǵy orta mektepke baryp, on noýtbýk syiǵa tartty, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Qurmetti Elshi qashyqtyqtan oqytý barysynda aianbai jumys jasaǵan ustazdarǵa erekshe alǵysyn bildirdi.
Sondai-aq, óńirimizdiń kieli oryndaryna qyzyǵýshylyq tanytqan qadirli meiman Otyrar aýdanyndaǵy «Arystan bab» kesenesinde de boldy.
– Tarihi mańyzy bar ǵimarattar men qasietti oryndardyń kelbetin saqtap qalý – memleket úshin mańyzdy. Meniń osy jolǵy Qazaqstanǵa saparymnyń basty maqsaty – «Arystan bab» kesenesinde bolyp, kóne Otyrar jerindegi sáýlet óneri eskertkishiniń tarihqa toly keremetin tamashalaý edi. Men óte qýanyshtymyn. Qalanyń tynys tirshiligi, mádenieti, tipti aýa raiy erekshe áser qaldyrǵanyn jasyrmaimyn, – dedi Liat Vekselman.
Sapardyń ekinshi kúni, elshi Liat Vekselman Tólebi aýdanyndaǵy №2 Tólebi balalar úiine bardy. Ondaǵy balalar úiine arnalǵan 70 gektar qiiar alqabynda bolyp, tamshylatyp sýarý ádisine arnalǵan sharanyń ashylý saltanatyna qatysyp, lentasyn qidy. Saltanatty sharadan soń, estelik kitabyna tilegin jazyp, qoltańbasyn qaldyrdy.
