Vitse-premerdiń aitýynsha, orys tili keshegi otarshylyq zamannan bastap qanymyzǵa sińgen til. Ol halqymyzǵa álemniń bilim esigin ashqan til. Sondyqtan, bul bárimizge túsinikti nárse.
– Al, aǵylshyn tili bul bolashaqtyń tili. Jalpy tehnika, tehnologiia, órkenietten qalmaimyz desek, mindetti túrde aǵylshyn tilin bilýimiz kerek. Bul tipti shartty túrde bilýimiz kerek. Ony bireý túsinýi múmkin, bireý túsinbeýi múmkin. Biraq jastar, sizder shette oqyp kelgen jastar, basqa memleketterde til máselesi qalai damydy, zertteý jumystary, tehnologiialar, taǵy basqamen tanysyp kelgen jastar ony bilesizder, túsinesizder. Sizder qoldaisyzdar dep bilemin, – dedi Imanǵali Tasmaǵambetov úshtuǵyrly til saiasatyna qatysty jaýabynda.
Vitse-premer til saiasatyna kelgende ózekti bolyp otyrǵan másele – ol ana tiliniń damýy jóninde ekenin aitty. Ol osynaý 25 jyldyń ishinde Elbasynyń tapsyrmasy boiynsha úkimet qazaq tiliniń qoldaný aiasyn keńeitý úshin birshama jumystar atqarǵandyǵyn atady.
– Birinshiden, zań qabyldanyp, qajetti qarajat bólindi. Mamandar daiyndaldy. Búgingi kúni qarap otyrsańyzdar, Parlamenttegi jappai jiyndardyń barlyǵy qazaq tilinde ótedi. Úkimettiń májilisi qazaq tilinde ótedi. Biraq, bir nárse túsiniksiz. Biz osy kúnge deiin, qazaq tili ózge emes, ózimizge kerek ekenin túsinbei kelemiz. Jalpy qazaq tili degen halyqtyń jany. Budan artyq aita almaisyń, – dep málimdedi jastar Forýmynyń plenarlyq otyrysynda sóilegen QR Premer-ministriniń orynbasary Imanǵali Tasmaǵambetov.
I.Tasmaǵambetov jinalǵan jastarǵa til máselesi kóterilgende Elbasynyń 25 jyl boiy aityp júrgeni – ol eń aldymen «qazaqtyń qazaqpen qazaqsha sóilesýi» ekenin aitty.
– Mine másele osynda. Biz óz tilimizdi ózimiz qurmettesek, biz oǵan shyn máninde janashyrlyq bildirsek qana tildiń bolashaǵy bolady. Til bar jerde qazaq bar. Til joq jerde qazaq joq. Sondyqtan til máselesine kelgende bar senetinimiz – jastar, sizder, – dep qadap aitty Imanǵali Tasmaǵambetov.
Derekkózi: baq.kz
