Almaty oblysynda itter talap tastaǵan 10 jastaǵy balanyń oqiǵasyna qatysty jelide videojazba tarady. Video Instagram-daǵy janýarlardy qorǵaý boiynsha Inucobo qaýymdastyǵynyń paraqshasynda jariialandy, dep habarlaidy Dalanews.kz.
Beinejazbanyń sipattamasynda Maksim esimdi balanyń dosymen birge táýeldi adamdardy ońaltý ortalyǵynyń qorshaýynyń mańynda uzaq oinaǵany aitylǵan.
"Bul ortalyqta ishimdik pen esirtkige táýeldi jandar emdeledi. Sol jerde kinolog Almaz óz itterin ustaidy. Balalardyń mundai jerde uzaq ýaqyt oinaýy – túsiniksiz jaǵdai. Ata-analary nege olardy osyndai jerlerden alys júrýge úiretpeidi?" – delingen videodaǵy sipattamada.
Janýarlardy qorǵaýshylar balalar itterdi ózderi ashýlandyryp, janýarlardyń agressiiasyn týǵyzǵan degen pikirde.
Tengrinews.kz saityna bergen suhbatynda itterdiń iesi, kinolog Almaz Hameev videojazbanyń kórshi ǵimarattaǵy kameradan túsirilgenin aitty. Onyń sózinshe, videoda naqty shabýyl sáti joq. Biraq onda balanyń aiqaiy men itterdiń úrgen daýysy anyq estiledi.
Hameevtiń aitýynsha, oqiǵa stadionda emes, ortalyqtyń jekemenshik aýlasynda bolǵan, balany ol jerge janyndaǵy dosy iterip jibergen-mys.
"Kamera aýmaqty tolyq qamtymaidy. Eger oqiǵa stadionda bolǵanda, daýys anyq estilmes edi", – deidi itterdiń iesi.
Qazir oqiǵa boiynsha tergeý jalǵasyp jatyr.
Eske salaiyq, Almaty oblysynyń Qarasai aýdanyna qarasty aýylda 10 jastaǵy balany eki qabaǵan it talap, aýyr jaraqattady. Oqiǵa 30 mamyrda bolǵan.
Oqiǵanyń basty kýágeri ári balany qutqaryp qalǵan aýyl turǵyny, zeinetker Serikbek Saqaibekovtyń aitýynsha, sol kúni kóligimen jolaýshy áieldi úiine jetkizý úshin bara jatqanda, bir top balanyń shýlap, jan-jaqqa qasha jónelgenin kórgen.
Qazir 10 jastaǵy bala Qarasai aýdandyq ortalyq aýrýhanasynda aýyr jaraqatpen em alyp jatyr.
Balanyń anasy Ekaterina Býrmistrovanyń aitýynsha, ulynyń jaǵdaiy óte qiyn.
