الماتى وبلىسىندا يتتەر تالاپ تاستاعان 10 جاستاعى بالانىڭ وقيعاسىنا قاتىستى جەلٸدە ۆيدەوجازبا تارادى. ۆيدەو Instagram-داعى جانۋارلاردى قورعاۋ بويىنشا Inucobo قاۋىمداستىعىنىڭ پاراقشاسىندا جارييالاندى, دەپ حابارلايدى Dalanews.kz.
بەينەجازبانىڭ سيپاتتاماسىندا ماكسيم ەسٸمدٸ بالانىڭ دوسىمەن بٸرگە تەۋەلدٸ ادامداردى وڭالتۋ ورتالىعىنىڭ قورشاۋىنىڭ ماڭىندا ۇزاق ويناعانى ايتىلعان.
"بۇل ورتالىقتا ٸشٸمدٸك پەن ەسٸرتكٸگە تەۋەلدٸ جاندار ەمدەلەدٸ. سول جەردە كينولوگ الماز ٶز يتتەرٸن ۇستايدى. بالالاردىڭ مۇنداي جەردە ۇزاق ۋاقىت ويناۋى – تٷسٸنٸكسٸز جاعداي. اتا-انالارى نەگە ولاردى وسىنداي جەرلەردەن الىس جٷرۋگە ٷيرەتپەيدٸ?" – دەلٸنگەن ۆيدەوداعى سيپاتتامادا.
جانۋارلاردى قورعاۋشىلار بالالار يتتەردٸ ٶزدەرٸ اشۋلاندىرىپ, جانۋارلاردىڭ اگرەسسيياسىن تۋعىزعان دەگەن پٸكٸردە.
Tengrinews.kz سايتىنا بەرگەن سۇحباتىندا يتتەردٸڭ يەسٸ, كينولوگ الماز حامەەۆ ۆيدەوجازبانىڭ كٶرشٸ عيماراتتاعى كامەرادان تٷسٸرٸلگەنٸن ايتتى. ونىڭ سٶزٸنشە, ۆيدەودا ناقتى شابۋىل سەتٸ جوق. بٸراق وندا بالانىڭ ايقايى مەن يتتەردٸڭ ٷرگەن داۋىسى انىق ەستٸلەدٸ.
حامەەۆتٸڭ ايتۋىنشا, وقيعا ستاديوندا ەمەس, ورتالىقتىڭ جەكەمەنشٸك اۋلاسىندا بولعان, بالانى ول جەرگە جانىنداعى دوسى يتەرٸپ جٸبەرگەن-مىس.
"كامەرا اۋماقتى تولىق قامتىمايدى. ەگەر وقيعا ستاديوندا بولعاندا, داۋىس انىق ەستٸلمەس ەدٸ", – دەيدٸ يتتەردٸڭ يەسٸ.
قازٸر وقيعا بويىنشا تەرگەۋ جالعاسىپ جاتىر.
ەسكە سالايىق, الماتى وبلىسىنىڭ قاراساي اۋدانىنا قاراستى اۋىلدا 10 جاستاعى بالانى ەكٸ قاباعان يت تالاپ, اۋىر جاراقاتتادى. وقيعا 30 مامىردا بولعان.
وقيعانىڭ باستى كۋەگەرٸ ەرٸ بالانى قۇتقارىپ قالعان اۋىل تۇرعىنى, زەينەتكەر سەرٸكبەك ساقايبەكوۆتىڭ ايتۋىنشا, سول كٷنٸ كٶلٸگٸمەن جولاۋشى ەيەلدٸ ٷيٸنە جەتكٸزۋ ٷشٸن بارا جاتقاندا, بٸر توپ بالانىڭ شۋلاپ, جان-جاققا قاشا جٶنەلگەنٸن كٶرگەن.
قازٸر 10 جاستاعى بالا قاراساي اۋداندىق ورتالىق اۋرۋحاناسىندا اۋىر جاراقاتپەن ەم الىپ جاتىر.
بالانىڭ اناسى ەكاتەرينا بۋرميستروۆانىڭ ايتۋىنشا, ۇلىنىڭ جاعدايى ٶتە قيىن.
