Irannyń rýhani kóshbasshysy Aiatolla Áli Hamenei Izraildiń Islam respýblikasyna jasaǵan áýe shabýylyn qatty synǵa alyp, jaýaptyń qatań bolatynyn eskertti, dep habarlaidy Dalanews.kz.
Bul týraly Iran aqparat quraldary habarlady.
"Izrail Iranǵa qarsy aýyr qylmys jasap, óziniń shynaiy bet-beinesin kórsetti. Bul áreketi úshin Izrail asa qatal jazalanady. Osy shabýyl arqyly sionistik rejim óziniń taǵdyryn aiqyndap berdi. Endi olar ashy saldarǵa daiyndala bersin, – dedi Hamenei.
13 maýsymǵa qaraǵan túni Izrail áskeri-áýe kúshteri Iran aýmaǵyna "aldyn ala soqqy" berdi. Osydan keiin Izrail óz áýe keńistigin jaýyp tastaǵan bolatyn. Izrail qorǵanys kúshteriniń (TsAHAL) resmi málimdemesinde soqqylar Irannyń iadrolyq baǵdarlamasyna qatysy bar ondaǵan nysandar men ózge de áskeri obektilerge jasalǵany aitylady.
13 maýsym kúni tańerteń TsAHAL ótken túni Iran aýmaǵynda júzden asa nysanǵa soqqy jasalǵanyn, operatsiiaǵa 200 áskeri ushaq qatysqanyn málimdedi.
Irannyń áskeri basshylary men ǵalymdary qaza tapty. Sheteldik BAQ-ta taraǵan málimetterge súiensek, shabýyl saldarynan Iran Qarýly kúshteri Bas shtabynyń basshysy Mohammad Bageri, Islam revoliýtsiiasyn qorǵaý korpýsynyń (KSIR) qolbasshysy Hossein Salami jáne iadrolyq baǵdarlama boiynsha belgili ǵalymdar – Fereidýn Abbasi-Davani men Mohammad Mehdi Tehranchi qaza tapqan. Sonymen birge aiatolla Hameneidiń keńesshisi Áli Shamhani aýyr jaraqat alyp, aýrýhanaǵa jetkizilgen.
Áli Hamenei 13 maýsymdaǵy málimdemesinde osy tulǵalardyń qaza tapqanyn rastap, olardy "sheiitter" dep atady.
Tańerteńgi aqparat boiynsha, Iran Bas shtabynyń ýaqytsha basshysy bolyp Habibolla Saiiari taǵaiyndaldy. Al KSIR qolbasshysy general Ahmad Vahidi boldy.
KSIR basshylyǵy Salamidiń ólimi úshin Izrailden kek alatynyn málimdedi. Iran qarýly kúshteri Bas shtabynyń ókili Abolfazyl Shekarchi Izrail tarapynyń aýyr jaýapqa daiyndalýy kerek ekenin eskertti.
Óz kezeginde Izrail Qarýly kúshteri Bas shtabynyń basshysy Eial Zamir el turǵyndaryna úndeý jasap, Iran tarapynan qarymta shabýyl jasalýy múmkin ekenin eskertti.
"Iran rejimi bizge qarsy soqqy berýge tyrysady, sonyń saldarynan bolatyn shyǵyndar buǵan deiingilerden de ózgeshe bolýy yqtimal", – dedi Zamir.
Buǵan deiin saitymyzda "Izraildiń Iranǵa soqqysy: Brent munaiy qymbattap, ǵalamdyq naryqqa qaýip tóndi" degen maqala jariialanǵan bolatyn.
