Elimizde kommýnaldyq qyzmetterdiń keibir tarifterin kóterý keiinge qaldyryldy. Úkimet bul azamattardyń qarjylyq júktemesin azaitýǵa jáne infliatsiia deńgeiin turaqtandyrýǵa múmkindik beretinin aitady, dep habarlaidy Dalanews.kz.
Ótken senbide vitse-premer – ulttyq ekonomika ministri Serik Jumanǵarinniń tóraǵalyǵymen Úkimette ótken jiynda birinshi jartyjyldyqtaǵy infliatsiia qorytyndysy qaraldy. Onda aitylǵandai, erte pisken ónimdi jappai jinaý bastalysymen, aldyn ala kútilgendei, áleýmettik mańyzy bar kókónister baǵasynyń ósýi toqtap qana qoimai, tómendei bastaǵan.
«Eger sáýirde áleýmettik ónimderdiń ortasha baǵa indeksi 1,6%-dy qurasa, mamyrda ósý qarqyny 1%-ǵa, al maýsymda - 0,7%-ǵa tómendedi. Sońǵy aptada ósim nebary 0,1% boldy. Sonymen qatar, úsh apta qatarynan kartop baǵasynyń 1,3%-ǵa tómendeýi baiqaldy. Ótken aptadan sábiz baǵasy 0,9%-ǵa arzandai bastady. Kúrish, qaraqumyq, jumyrtqa, un men makoron ónimderiniń baǵasy túsip jatyr. Nan men sút baǵasy turaqty bolyp tur», — dedi saýda jáne integratsiia birinshi vitse-ministri Aijan Bijanova.
Qazaqstanda otandyq azyq-túlik óndirisi artyp keledi. 2025 jyldyń 5 aiynda onyń kólemi 10,5%-ǵa ósip, 1,5 trln teńgeni qurady. Áleýmettik azyq-túlik taýarlarynyń ishinde eń kóp ósimdi qyzylsha qanty (4,6 myń tonnadan 64 myń tonnaǵa deiin), ósimdik maiy (316,3 myń tonnadan 376,8 myń tonnaǵa deiin), sary mai (13 myń tonnadan 15 myń tonnaǵa deiin), un (1,3 mln tonnadan 1,4 mln tonnaǵa deiin), ashytylǵan sút ónimderi (102 myń tonnadan 106 myń tonnaǵa deiin), óńdelgen sút (264 myń tonnadan 274,6 myń tonnaǵa deiin) jáne taǵy basqalary kórsetti.
Qazaqstan EAEO elderi arasynda áleýmettik azyq-túlikterge eń qoljetimdi baǵaǵa ie
Jiynda Qazaqstan EAEO elderi arasynda azyq-túliktiń qoljetimdiligi boiynsha jetekshi oryndy saqtap otyrǵany atap ótildi. EAEO elderindegi áleýmettik mańyzǵa ie azyq-túlik taýarlarynyń naryqtyq baǵasyn salystyrmaly taldaý olardyń Qazaqstanda anaǵurlym qoljetimdi ekenin kórsetti. Atap aitqanda, Qazaqstanda taýyq jumyrtqasy, un, nan, kúnbaǵys maiy, tuz, kúrish, kartop, qyryqqabat, piiaz, sábiz eń tómen baǵa tirkelgen.
Tórt pozitsiia boiynsha: qaraqumyq, qant, siyr eti jáne sút boiynsha Qazaqstandaǵy baǵalar Belarýstegi baǵaǵa jaqyn. Sary mai boiynsha elimiz Belarýs pen Qyrǵyzstannan keiin úshinshi orynda, al qus eti boiynsha Belarýs pen Reseiden keiin.
Aqyly qyzmetter birinshi jartyjyldyqta infliatsiia ósiminiń negizgi faktory boldy (16,1%). Osyǵan bailanysty Úkimet kommýnaldyq qyzmetter tarifiniń ósý qarqynyn retteý týraly sheshim qabyldady. Olardyń ósýin ishinara keiinge qaldyrdy. Bul azamattardyń qarjylyq júktemesin azaitýǵa jáne infliatsiia deńgeiin turaqtandyrýǵa múmkindik beredi.
