Batys Qazaqstan oblysy delegatsiiasynyń jetekshisi, oblys ákimi Nariman Tóreǵaliev Qytai Halyq Respýblikasyna resmi sapary aiasynda Tsziansý provintsiiasy Halyq úkimetiniń tóraǵasy, partiia komiteti hatshysynyń orynbasary Siýi Kýnlinmen kezdesti,- dep habarlaidy Dalanews.kz
Nariman Tóreǵaliev óz sózinde Qazaqstan Respýblikasynyń Prezidenti Qasym-Jomart Kemeluly Toqaev 2025 jylǵy 16 maýsymda Astana qalasynda ótken 2-shi «Qytai – Ortalyq Aziia» sammitinde Qytai Halyq Respýblikasynyń Tóraǵasy Si Tszinpinmen kezdesýi barysynda QHR Qazaqstannyń iri saýda-ekonomikalyq seriktesi dep aitqanyn jáne elder arasyndaǵy qarym-qatynas árqashan dostyq pen yntymaqtastyqqa qurylǵanyn atap ótti.
«Qazaqstan úshin Qytai mańyzdy qyzmet salalaryndaǵy strategiialyq seriktes. Bizdi qos memlekettiń táýelsiz damý jolyn saqtai otyryp, tatý kórshilik pen ózara syilastyq qaǵidattary negizinde ǵasyrlar boiy qalyptasqan tarihi dostyq bailanystyrady. Bul týraly eki el kóshbasshylary joǵary deńgeidegi kezdesýlerde birneshe ret aityp ótken bolatyn.
Batys Qazaqstan oblysy – Qazaqstannyń "batys qaqpasy". Qytaimen aradaǵy tyǵyz saýda-ekonomikalyq bailanystardy eskere otyryp, biz ekijaqty yntymaqtastyqty keńeitý úshin, ózara tiimdi jobalardy júzege asyrýǵa daiynbyz», – dedi N. Tóreǵaliev.
Tsziansý provintsiiasynyń Halyq úkimetiniń tóraǵasy da óńirmen saýda-ekonomikalyq bailanysty nyǵaitýǵa múddeli ekenin bildirdi. Siýi Kýnlin provintsiianyń Qazaqstanmen tabysty yntymaqtastyq ornatylǵanyn jáne júzege asyrylǵan birqatar jobalar osynyń dáleli ekenin atap ótti.
Kelissózder barysynda taraptar Batys Qazaqstan oblysy men Qytaidyń eń damyǵan indýstriialyq óńirleriniń biri – Tsziansý provintsiiasy arasyndaǵy saýda-ekonomikalyq áriptestikti tereńdetý máselelerin talqylady.
BQO ákimi óńirdiń Qytaidyń indýstrialdy-logistikalyq ortalyqtarymen tikelei bailanys ornatýǵa strategiialyq múddeli ekenin atap ótti. Sondai-aq ol saýda ainalymynyń joǵary qarqynyna toqtaldy: 2024 jyly BQO men Qytai arasyndaǵy taýar ainalymy 25 paiyzǵa artyp, 88,4 million AQSh dollaryn qurady.
Kezdesý barysynda mynadai salalardaǵy jobalardy iske asyrý máselelerine erekshe nazar aýdaryldy:
- aýyl sharýashylyǵy jáne avtokólik tehnikasyn óndirý,
- qatty turmystyq qaldyqtardy jáne aýyl sharýashylyq ónimderin óńdeý,
- tazartý qurylystaryn salý jáne jańǵyrtý;
- Qytai – Ortalyq Aziia – Eýropa baǵyty boiynsha logistikalyq marshrýttardy damytý.
Taraptar ekijaqty bailanysty jandandyrýǵa, sondai-aq Qytai investorlarynyń Batys Qazaqstandaǵy agroónerkásip jáne ónerkásip klasterlerine qatysýyn arttyrýǵa kelisti.
Kezdesý sońynda oblys ákimi Tsziansý provintsiiasynyń basshylyǵyna jyly qabyldaýy úshin alǵysyn bildirip, qol jetkizilgen kelisimder eki jaqty ózara tiimdi yntymaqtastyqtyń berik negizine ainalatynyna senim bildirdi.
Bul kezdesý Qazaqstan Respýblikasynyń Qytai Halyq Respýblikasyndaǵy Elshiliginiń qoldaýymen uiymdastyryldy.
