Túrkistan oblysy ákimi Darhan Satybaldy apparattyń aptalyq májilisinde jaýapty basqarma men aýdan, qala ákimderine jáne indýstrialdy aimaqtarǵa jaýapty mekeme basshylaryna sońǵy ret eskertý jasady.
– Indýstrialdy aimaqtarda jańa kásiporyndar, zaýyttar salynýy tiis. Óndiristi órkendetpei oblysymyz damymaidy. Bizge odan basqa jol joq. Jumysty kúsheitińizder.
Indýstrialdy aimaqtary qaraýsyz qalǵan, infraqurylymy nasharlaǵan aýdan, qala ákimderine budan bylai qatań shara qoldanylady. Bul máseleni buǵan deiin de talqylaǵan bolatynbyz. Indýstrialdy aimaqtardaǵy kemshilikterdi retke keltirý, óndiris oryndaryn ashý boiynsha naqty is-sharalar jospary jasalyp, oryndalý merzimi belgilensin. Usynystar berilsin.
Eger bul tapsyrma oryndalmasa, basqarýshy kompaniianyń, aýdan, qala ákimi nemese orynbasarlarynyń qyzmetke sáikestigin qaraimyz. Naqty jumys kerek, investitsiia tartyńyzdar, áleýetin paidalanyńyzdar. Birlese jumys atqaryńyzdar, – dedi Darhan Satybaldy.
Oblystyq kásipkerlik jáne ónerkásip basqarmasynyń basshysy Nurjigit Myrzahmetovtyń aitýynsha, Túrkistan oblysy ákimdiginiń qaýlysyna sáikes, «Turkistan» indýstrialdy aimaqtardy basqarýshy kompaniiasy» JShS qurylǵan.
Jalpy oblysta 544,52 gektardy quraityn (426,4 getar basqarýshy kompaniia teńgeriminde) 9 indýstrialdy aimaq ornalasqan. Onda quny 75,9 mlrd teńgeni qurap, 3684 adamdy jumys ornymen qamtamasyz etetin 67 joba ornalasqan.
9 indýstrialdy aimaqtyń infraqurylymyn jaqsartý jumysy qolǵa alynǵan. Alaida, indýstrialdy aimaqtarǵa infraqurylymdy tolyq júrgizý úshin qosymsha qarajat qajet.
Túrkistan qalasynyń indýstrialdy aimaǵynyń 40 gektar aýmaǵynda infraqurylym júrgizý úshin 904 mln teńge qarjy bólinip, infraqurylym júieleriniń qurylys-montajdaý jumystary aiaqtalǵan (avtojol – 4,21 km, elektrmen jabdyqtaý – 23,3 km, sýmen jabdyqtaý – 11,9 km, káriz – 4,03 km, gazben jabdyqtaý – 1,1 km, telefondandyrý – 7,9 km, transformatorlary 6 dana).
Sondai-aq 150 gektar aýmaqty infraqurylym júiesimen qamtamasyz etý úshin 2,2 mlrd. teńge qarastyrylyp (46 ga jer), sáikesinshe tiisti infraqurylym júrgizilgen. Kentaý, Ordabasy, Maqtaaral, Sozaq, Shardara, Báidibek, Túlkibas jáne Qazyǵurt aýdandaryndaǵy indýstrialdy aimaqtardyń infraqurylym jelileriniń qurylys-montajdaý jumystary aiaqtalǵan. Birneshe aýdan, qalada endi salynady.
Degenmen keibir aýdan, qalada indýstrialdy aimaqtar qaraýsyz qalǵan, jan-jaǵy qorshalmaǵan jáne birqatarynda jobalar júzege aspaǵan. Atalǵan máseleni sheshý, kemshilikti joiý tapsyrmasy hattamaǵa engizilip, qatań baqylaýǵa alyndy.
