Túrkistan oblysynda óndiris oryndaryn ashý, investitsiia tartý, indýstrialdy aimaqtardy damytý jáne kóbeitý jumystar jalǵasyp jatyr, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Óńirde 1 700 gektardan turatyn óńirlik mańyzy bar 14 indýstrialdy aimaq bolsa, onyń ishindegi 5-eýi sońǵy 1 jyldyń ishinde quryldy. Sonymen qatar Arys qalasyndaǵy «Mega-Agat» jáne Ordabasy aýdanyndaǵy «Bókei» kompaniialarynyń usynystary boiynsha 2 jeke indýstrialdy aimaq qurylyp, jumys istep turǵan jáne jańadan qurylǵan indýstrialdy aimaqtardyń sany 16-ny qurap otyr. Ol óndiristik aimaqtarda búgingi kúnge 120 mlrd teńgeni quraityn 82 joba júzege asyrylýda.
Túrkistan oblysynyń ákimi Nuralhan Kósherov indýstrialdy aimaqtardyń jumysyn jandandyrý, jańa jobalardy júzege asyrý jóninde májilis ótkizip, ózekti máselelerdi talqylady. Jaýapty basshylarǵa tiisti tapsyrmalar berdi.
– Óńirde jańadan qurylǵan jáne endi ashylatyn indýstrialdy aimaqtardy qajetti jermen, infraqurylymmen qamtý jumysyn júrgizińizder. Jumys istep turǵan indýstrialdy aimaqtarǵa jańa investorlar tartyp, jobalardy kóbeitý mańyzdy. Aýdan, qala ákimderi, jaýapty basqarma basshylary osy baǵytta jumysty kúsheitińizder. Jańasha kózqaras, izdenis, zerdeleý jumystary qajet. Jerdi alyp, jumysyn bastamaǵan kásipkerlermen kelisimdi toqtatyp, jerdi qaitarý kerek. Indýstrialdy aimaqtardy abattandyrý, kógaldandyrý, retke keltirý máselesi de nazarda bolsyn, – dedi Nuralhan Kósherov.
Túrkistan oblysynyń kásipkerlik jáne ónerkásip basqarmasynyń basshysy Nurjigit Myrzahmetov osy salada atqarylǵan jumystardy, kórsetkishterdi baiandady. Jańadan ashylǵan jáne ashylýy josparlanǵan indýstrialdy aimaqtardy gaz, elektr, sý jáne ózge de infraqurylymmen qamtý, jer telimin alý máseleleri týraly aitty. Oblys ákiminiń tapsyrmasymen aýdan jáne qala ákimdikteri jańadan qurylatyn indýstrialdy aimaqtar boiynsha usynystaryn berdi. Jer telimderi infraqurylym núktelerine jaqyn ornalasqan.
Aita keteiik, Túrkistan oblysyndaǵy óndiristik aimaqtardaǵy jobalardyń basym bóligi qurylys materialdaryn óndirý, daiyn metall ónimderin óndirý, metallýrgiia, mashina jasaý, jeńil jáne jihaz ónerkásibi salalaryna jumyldyrylǵan. 2024 jyly Óńirlik úilestirý keńesi tarapynan 18 investitsiialyq joba maquldanyp, indýstrialdy aimaqtarǵa engizilgen.
