تۇركىستان وبلىسىندا ءوندىرىس ورىندارىن اشۋ، ينۆەستيسيا تارتۋ، يندۋستريالدى ايماقتاردى دامىتۋ جانە كوبەيتۋ جۇمىستار جالعاسىپ جاتىر، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
وڭىردە 1 700 گەكتاردان تۇراتىن وڭىرلىك ماڭىزى بار 14 يندۋستريالدى ايماق بولسا، ونىڭ ىشىندەگى 5-ەۋى سوڭعى 1 جىلدىڭ ىشىندە قۇرىلدى. سونىمەن قاتار ارىس قالاسىنداعى «مەگا-اگات» جانە ورداباسى اۋدانىنداعى «بوكەي» كومپانيالارىنىڭ ۇسىنىستارى بويىنشا 2 جەكە يندۋستريالدى ايماق قۇرىلىپ، جۇمىس ىستەپ تۇرعان جانە جاڭادان قۇرىلعان يندۋستريالدى ايماقتاردىڭ سانى 16-نى قۇراپ وتىر. ول وندىرىستىك ايماقتاردا بۇگىنگى كۇنگە 120 ملرد تەڭگەنى قۇرايتىن 82 جوبا جۇزەگە اسىرىلۋدا.
تۇركىستان وبلىسىنىڭ اكىمى نۇرالحان كوشەروۆ يندۋستريالدى ايماقتاردىڭ جۇمىسىن جانداندىرۋ، جاڭا جوبالاردى جۇزەگە اسىرۋ جونىندە ءماجىلىس وتكىزىپ، وزەكتى ماسەلەلەردى تالقىلادى. جاۋاپتى باسشىلارعا ءتيىستى تاپسىرمالار بەردى.
– وڭىردە جاڭادان قۇرىلعان جانە ەندى اشىلاتىن يندۋستريالدى ايماقتاردى قاجەتتى جەرمەن، ينفراقۇرىلىممەن قامتۋ جۇمىسىن جۇرگىزىڭىزدەر. جۇمىس ىستەپ تۇرعان يندۋستريالدى ايماقتارعا جاڭا ينۆەستورلار تارتىپ، جوبالاردى كوبەيتۋ ماڭىزدى. اۋدان، قالا اكىمدەرى، جاۋاپتى باسقارما باسشىلارى وسى باعىتتا جۇمىستى كۇشەيتىڭىزدەر. جاڭاشا كوزقاراس، ىزدەنىس، زەردەلەۋ جۇمىستارى قاجەت. جەردى الىپ، جۇمىسىن باستاماعان كاسىپكەرلەرمەن كەلىسىمدى توقتاتىپ، جەردى قايتارۋ كەرەك. يندۋستريالدى ايماقتاردى اباتتاندىرۋ، كوگالداندىرۋ، رەتكە كەلتىرۋ ماسەلەسى دە نازاردا بولسىن، – دەدى نۇرالحان كوشەروۆ.
تۇركىستان وبلىسىنىڭ كاسىپكەرلىك جانە ونەركاسىپ باسقارماسىنىڭ باسشىسى نۇرجىگىت مىرزاحمەتوۆ وسى سالادا اتقارىلعان جۇمىستاردى، كورسەتكىشتەردى باياندادى. جاڭادان اشىلعان جانە اشىلۋى جوسپارلانعان يندۋستريالدى ايماقتاردى گاز، ەلەكتر، سۋ جانە وزگە دە ينفراقۇرىلىممەن قامتۋ، جەر تەلىمىن الۋ ماسەلەلەرى تۋرالى ايتتى. وبلىس اكىمىنىڭ تاپسىرماسىمەن اۋدان جانە قالا اكىمدىكتەرى جاڭادان قۇرىلاتىن يندۋستريالدى ايماقتار بويىنشا ۇسىنىستارىن بەردى. جەر تەلىمدەرى ينفراقۇرىلىم نۇكتەلەرىنە جاقىن ورنالاسقان.
ايتا كەتەيىك، تۇركىستان وبلىسىنداعى وندىرىستىك ايماقتارداعى جوبالاردىڭ باسىم بولىگى قۇرىلىس ماتەريالدارىن ءوندىرۋ، دايىن مەتالل ونىمدەرىن ءوندىرۋ، مەتاللۋرگيا، ماشينا جاساۋ، جەڭىل جانە جيھاز ونەركاسىبى سالالارىنا جۇمىلدىرىلعان. 2024 جىلى وڭىرلىك ۇيلەستىرۋ كەڭەسى تاراپىنان 18 ينۆەستيسيالىق جوبا ماقۇلدانىپ، يندۋستريالدى ايماقتارعا ەنگىزىلگەن.
