"Igilik!". Jetisaida bir kúnde 5 aýylǵa tabiǵi gaz berildi
Atap aitqanda, kógildir otynǵa qol jetkizgen aýdannyń Sh.Dildábekov aýyl okrýgine qarasty Dostyq, Baidala, Zerdeli aýyldary men Atameken aýyldyq okrýgine qarasty Tyńdala jáne Qoǵaly eldi mekenderi. Aimaq basshysy Dostyq aýylyndaǵy gaz torabyn iske qosý rásimine qatysyp, endigi kezekte 5 myńǵa jýyq halqy bar bes aýyl turǵyndarynyń kómir tasyp, kúl shyǵarmaitynyn jetkizdi.
«Qurmetti túrkistandyqtar! Qadirmendi Jetisai aýdanynyń turǵyndary! Búgin sizder men bizder kópten kútken úlken qýanyshtyń kýási bolǵaly otyrmyz. Iaǵni, búgin Túrkistan oblysyna qarasty Jetisai aýdanynda bes eldimekenniń turǵyndary tabiǵi gazǵa qol jetkizip otyr. Qazirgi tańda Jetisai aýdanynda 104 eldimekenniń 46-sy, iaǵni 22 096 abonent tabiǵi gazben qamtylsa, bul aýdandaǵy eldi mekenderdiń jalpy sanynyń 44,2 paiyzyn qurap otyr. Al abonent sany boiynsha 74,4 paiyzǵa jetti», - dedi Janseiit Qanseiituly.
Jalpy alǵanda biylǵy jyly Jetisai aýdanyndaǵy eldi mekenderdi gazdandyrý maqsatynda 5 nysannyń qurylysyna oblystyq biýdjetten 615,4 mln teńge qaralǵan bolatyn. Onyń ishinde 1 nysannyń qurylys-montaj jumystary 2018 jyldyń shilde aiynda aiaqtalsa, 3 eldi mekenniń qurylysy jyl sońyna deiin el igiligine tapsyrylady dep kútilýde.
Aita ketelik Jetisai aýdanynyń damý kontseptsiiasyna sáikes 2019-2025 jyldary osy óńirdegi 104 eldi mekenniń bári derlik 100 paiyz gazben qamtylady degen jospar bar.
