Úkimet qaýlysymen Qoja Ahmet Iasaýı kesenesi memlekettik qorǵaýǵa alyndy. Budan bylaı «Áziret Sultan» murajaı-qoryǵy endi memlekettik qorǵaýda bolady. QR Premer-Mınıstri Oljas Bektenov tıisti qaýlyǵa qol qoıdy, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Belgili tarıhı eskertkish – Qoja Ahmet Iasaýı kesenesi IýNESKO-nyń búkilálemdik mura tizimine engizilgen alǵashqy qazaqstandyq nysan jáne ortaǵasyrlyq sáýlet óneriniń biregeı eskertkishterine jatady.
Onyń mańyzdylyǵy men tarıhı-mádenı qundylyǵyn eskere otyryp, onyń saqtalýyn qamtamasyz etý maqsatynda Úkimet «Áziret Sultan» murajaı-qoryǵyn memlekettik qorǵaýǵa jatatyn obektiler tizbesine engizý týraly sheshim qabyldady.
Nysannyń qaýipsizdigin ishki ister organdarynyń tıisti bólimsheleri qamtamasyz etedi. Kesene Túrkistan qalasynda túrki aqyny jáne sopylyq ilimniń negizin qalaýshy Qoja Ahmet Iasaýı jerlengen orynda turǵyzylǵan.
Kesene segiz bólmeden turady. Olar Taıqazan turǵan ortadaǵy eń úlken zaldy aınala ornalasqan. 1385-1405 jyldar aralyǵynda keseneniń tóńiregine qosalqy ǵımarattar salynǵan. Búginde murajaı-qoryq aýmaǵyna meshit, Úlken jáne Kishi Aqsaraı zaldary, kitaphana jáne sharýashylyq kesheni: qudyq, ashana, turǵynjaılar (hujralar) jáne t. b kiredi.
