Halyqaralyq CERAWeek 2025 energetıkalyq konferensıasy aıasynda Qazaqstan Respýblıkasynyń Energetıka mınıstri Almasadam Sátqalıev AQSH Energetıka mınıstri Krıs Raıtpen kezdesti. Kezdesýdiń negizgi taqyryptary munaı-gaz salasyndaǵy birlesken jobalardy iske asyrý, eki el arasyndaǵy Strategıalyq energetıkalyq dıalogty (SED) damytý, energıa resýrstaryn jetkizýdi ártaraptandyrý jáne "jasyl" energetıka salasyndaǵy yntymaqtastyq máseleleri boldy, dep habarlaıdy Dalanews.kz.
Mınıstrler Qashaǵan, Teńiz jáne Qarashyǵanaq jobalarynyń iske asyrylý barysyn jan-jaqty talqylady. Qazaqstandyq tarap bul jobalarǵa amerıkalyq ınvestısıalar men tehnologıalardy tartýdyń mańyzdylyǵyn atap ótti.
SED aıasynda taraptar parnıktik gazdar shyǵaryndylaryn azaıtý, jańartylatyn energıa kózderin (JEK) damytý, beıbit atom energetıkasy salasyndaǵy ózara is-qımyl jáne strategıalyq mańyzy bar materıaldardy óndirý sıaqty baǵyttar boıynsha yntymaqtastyq perspektıvalaryn qarastyrdy. Qazaqstan shaǵyn modýldik reaktorlardy (SMR) ázirleý jáne paıdalaný boıynsha AQSH tájirıbesin zertteýge qyzyǵýshylyq bildirdi.
Kezdesýde Qazaqstan munaıyn tasymaldaý marshrýttaryn ártaraptandyrý máselesine erekshe nazar aýdaryldy. Mınıstr Sátqalıev Transkaspıı halyqaralyq kólik dáliziniń mańyzdylyǵyn atap ótip, onyń damýyna AQSH-tyń qoldaý kórsetetinine senim bildirdi.
Taraptar, sondaı-aq, sanksıalyq shekteýlerdiń qazaqstandyq munaıdy álemdik naryqqa turaqty jetkizýge áser etý máselelerin talqylady.
"Qazaqstan men AQSH energetıka salasynda strategıalyq seriktester bolyp tabylady. Biz ózara yntymaqtastyǵymyzdy joǵary baǵalaımyz jáne ony odan ári keńeıtý úshin, ásirese "jasyl" energetıka jáne jańa tehnologıalar salasynda, zor áleýet kórip otyrmyz. Ortaq kúsh-jigerimiz jahandyq energetıkalyq qaýipsizdikti qamtamasyz etý men turaqty damýǵa eleýli úles qosady dep senemin", – dep málimdedi Qazaqstan Respýblıkasynyń Energetıka mınıstri Almasadam Sátqalıev.
Aıta ketsek, buǵan deıin AQSH Memlekettik hatshysy Marko Rýbıo Qazaqstan premer-mınıstriniń orynbasary – Syrtqy ister mınıstri Murat Nurtileýmen telefon arqyly sóılesken bolatyn. Taraptar saıası dıalog pen ekonomıkalyq baılanystardy nyǵaıtýǵa erekshe nazar aýdara otyryp, keńeıtilgen strategıalyq seriktestiktiń qazirgi jaı-kúıi men damý perspektıvalaryn talqylady.
