Hýsei myrzanyń aitýynsha dunǵandardyń Orta Aziiaǵa, onyń ishinde Qazaqstanǵa ornyqqanyna 135 jyldan asqan.
"Osy arada dunǵandardyń 6-shy, 7-shi býyny ómirge kelip, ósip-órkendeýde", – deidi ol.
Daýrovtyń dunǵan qaýymdastyǵyna jetekshilik etkenine biyl 20 jyl. Dunǵan ultynyń múddesi úshin otqa da, sýǵa da túsýge daiynmyn deidi.
"Dunǵan" shyǵys ulty degen maǵynany beredi. Qytaidan alyp kelgen dándi daqyldardy qazaq jerinde molynan egip, aýyl sharýashylyǵyn jolǵa qoidyq", – deidi ol.
Aitýynsha Qazaqstan táýelsizdik alǵan jyly Qordai aýdanyndaǵy dunǵandar qonys tepken Shensi aýylyna Qytaidan arnaiy delegatsiia kelgen. Osyndaǵy dunǵandar atajurttan kelgen aǵaiyndy qushaq jaia qarsy alyp, amandyq-saýlyq surasyp, maýqyn basypty.
Hýsai myrza ózin ata-baba amanatyn keiingi tolqynǵa tabystaýshy dep sanaidy.
"Ata-babanyń "dunǵannyń tili men dástúrin saqtaý - ultty saqtaý" degen ósietin umytqan joqpyz. Osy maqsatta orys álipbiiniń negizinde dunǵan tilin jasadyq", – deidi ol.
Qazaqstandaǵy dunǵandardyń tútini túzý. TMD aýmaǵynda 130 myńǵa tarta, bir Qazaqstannyń ózinde 60 myńnan asa dunǵan turady. Olardyń 80 paiyzy Jambyl oblysynda shoǵyrlanǵan.
"Dunǵandar aýyl sharýashylyǵymen ainalysady. Qazaqstannyń búkil óńirine shóp-shalam, jemis jidek, kókónis jetkizemiz", – deidi Hýsei myrza.
Aitýynsha dunǵandardyń derligi qytai tilin táýir biletindikten Qytai kásiporyndarymen bailanys ornatqan, shekara mańynda saýda-sattyqpen ainalysatyn da negizinen osy – dunǵandar.
"Iá, dunǵandardyń derligi bizneste. Qazaqstanda dunǵan restorandary kóp. Kópshiligi (dunǵandardy aitady red.) qytai tilin biledi. Dál qazir biz dáýletti, baqýatty turamyz".
Dunǵandardyń qytai tilin úirenýi úshin qaýymdastyq basshysy "Konfýtsii mektebin" ashypty. Osy aradan tálim alǵan dunǵan jastary ári qarai Qytaiǵa oqýǵa attanady eken.
"Biz be? Biz oryssha taza sóileimiz. Orys tili bizdiń týǵan tilimiz. Orys tili bizdiń TMD kólemindegi biznesimizdi damytýǵa dánekerlik etedi", – deidi ol.
Daýrov Orta Aziiadaǵy dunǵandardyń dáýirleý zamany alda dep biledi. Bul maqsatqa jetýge irgedegi aǵaiyny qol ushyn sozaryna senimdi.
