حۋسەي مىرزانىڭ ايتۋىنشا دۇنعانداردىڭ ورتا ازياعا، ونىڭ ىشىندە قازاقستانعا ورنىققانىنا 135 جىلدان اسقان.
"وسى ارادا دۇنعانداردىڭ 6-شى، 7ء-شى بۋىنى ومىرگە كەلىپ، وسىپ-وركەندەۋدە"، – دەيدى ول.
داۋروۆتىڭ دۇنعان قاۋىمداستىعىنا جەتەكشىلىك ەتكەنىنە بيىل 20 جىل. دۇنعان ۇلتىنىڭ مۇددەسى ءۇشىن وتقا دا، سۋعا دا تۇسۋگە دايىنمىن دەيدى.
"دۇنعان" شىعىس ۇلتى دەگەن ماعىنانى بەرەدى. قىتايدان الىپ كەلگەن ءداندى داقىلداردى قازاق جەرىندە مولىنان ەگىپ، اۋىل شارۋاشىلىعىن جولعا قويدىق"، – دەيدى ول.
ايتۋىنشا قازاقستان تاۋەلسىزدىك العان جىلى قورداي اۋدانىنداعى دۇنعاندار قونىس تەپكەن شەنسي اۋىلىنا قىتايدان ارنايى دەلەگاسيا كەلگەن. وسىنداعى دۇنعاندار اتاجۇرتتان كەلگەن اعايىندى قۇشاق جايا قارسى الىپ، اماندىق-ساۋلىق سۇراسىپ، ماۋقىن باسىپتى.
حۋساي مىرزا ءوزىن اتا-بابا اماناتىن كەيىنگى تولقىنعا تابىستاۋشى دەپ سانايدى.
"اتا-بابانىڭ "دۇنعاننىڭ ءتىلى مەن ءداستۇرىن ساقتاۋ - ۇلتتى ساقتاۋ" دەگەن وسيەتىن ۇمىتقان جوقپىز. وسى ماقساتتا ورىس ءالىپبيىنىڭ نەگىزىندە دۇنعان ءتىلىن جاسادىق"، – دەيدى ول.
قازاقستانداعى دۇنعانداردىڭ ءتۇتىنى ءتۇزۋ. تمد اۋماعىندا 130 مىڭعا تارتا، ءبىر قازاقستاننىڭ وزىندە 60 مىڭنان اسا دۇنعان تۇرادى. ولاردىڭ 80 پايىزى جامبىل وبلىسىندا شوعىرلانعان.
"دۇنعاندار اۋىل شارۋاشىلىعىمەن اينالىسادى. قازاقستاننىڭ بۇكىل وڭىرىنە ءشوپ-شالام، جەمىس جيدەك، كوكونىس جەتكىزەمىز"، – دەيدى حۋسەي مىرزا.
ايتۋىنشا دۇنعانداردىڭ دەرلىگى جۇڭگو ءتىلىن ءتاۋىر بىلەتىندىكتەن جۇڭگو كاسىپورىندارىمەن بايلانىس ورناتقان، شەكارا ماڭىندا ساۋدا-ساتتىقپەن اينالىساتىن دا نەگىزىنەن وسى – دۇنعاندار.
"ءيا، دۇنعانداردىڭ دەرلىگى بيزنەستە. قازاقستاندا دۇنعان رەستوراندارى كوپ. كوپشىلىگى (دۇنعانداردى ايتادى رەد.) جۇڭگو ءتىلىن بىلەدى. ءدال ءقازىر ءبىز داۋلەتتى، باقۋاتتى تۇرامىز".
دۇنعانداردىڭ جۇڭگو ءتىلىن ۇيرەنۋى ءۇشىن قاۋىمداستىق باسشىسى "كونفۋسيي مەكتەبىن" اشىپتى. وسى ارادان ءتالىم العان دۇنعان جاستارى ءارى قاراي قىتايعا وقۋعا اتتانادى ەكەن.
"ءبىز بە؟ ءبىز ورىسشا تازا سويلەيمىز. ورىس ءتىلى ءبىزدىڭ تۋعان ءتىلىمىز. ورىس ءتىلى ءبىزدىڭ تمد كولەمىندەگى بيزنەسىمىزدى دامىتۋعا دانەكەرلىك ەتەدى"، – دەيدى ول.
داۋروۆ ورتا ازياداعى دۇنعانداردىڭ داۋىرلەۋ زامانى الدا دەپ بىلەدى. بۇل ماقساتقا جەتۋگە ىرگەدەگى اعايىنى قول ۇشىن سوزارىنا سەنىمدى.
