Májilis depýtaty Nurtai Sabilianov Parlamentte halyqtyń máselesin kóteretin, bilikti depýtattar otyrýy kerek ekenin aitty, dep habarlaidy dalanews.kz.
Depýtat Májilistegi pikirtalastar ashyq ótýi tiis ekenin aityp, halyq pen úkimet arasyndaǵy máseleler parlamentte erkin kóterilýi kerek ekenin málimdedi.
«Depýtattar halyqtyń máselesin kóterýi kerek. Májiliske kelgen azamattar zań jobasyna qatysatyn úkimet múshelerine suraq qoiyp, óz máselesin ashyq aitýy tiis. Etika saqtalýy kerek, biraq bul jerde bireýdi synama nemese másele kóterme degen talap bolmaýy qajet. Parlament bolǵannan keiin eldegi barlyq másele ashyq talqylanýy kerek», - dedi Nurtai Sabilianov.
Onyń pikirinshe, Májiliste formaldy túrde emes, naqty jumys isteitin azamattar otyrýy qajet.
Sabilianov qazirgi quramda ártúrli adamdar otyrǵanyn aityp, halyqtyń sózin sóileitin, tájiribeli ári kásibi deńgeii joǵary depýtattardyń qajet ekenin meńzedi.
«Halyqtyń máselesin sheshe alatyn, bilimi men biligi bar azamattar jumys isteýi qajet. Qazir ártúrli adamdar otyr. Sondyqtan jumys isteitin, eldiń sózin sóileitin azamattar kelýi kerek dep oilaimyn», - dedi depýtat.
Sonymen qatar ol depýtattardyń jeke múddesin parlament minberine shyǵarýy durys emes ekenin aitty.
Onyń sózinshe, Májilis halyqtyń problemasyn sheshetin oryn bolýy kerek, al týystarǵa qatysty máselelerdi kóterý depýtattyq etikaǵa qaishy keledi.
«Al jeke basyna qatysty máselelerdi depýtat parlamentte kótermeýi tiis. Óziniń týysyna nemese jaqynyna bailanysty máseleni Májiliske alyp shyǵý etikaǵa jatpaidy. Depýtat qarapaiym halyqtyń, shalǵai aýylda júrgen azamattardyń máselesin kóterip, sonyń sheshilýine jumys isteýi kerek», - dedi Nurtai Sabilianov.
