Atyraý turǵyny Jaıyq Imanbaev onyń baýyrlary Ǵabbas Imanbaev pen Berik Abdolla Qarjylyq monıtorıń agenttigi qozǵaǵan qylmystyq is boıynsha aıyptalyp otyrǵanyn aıtty, dep habarlaıdy Dalanews.kz "Aq Jaıyqqa" siltep.

Tergeý nusqasyna sáıkes olar basqarǵan stomatologıalyq klınıka azamattardyń BJZQ-dan alǵan qarajatyn maqsatsyz jumsaýǵa qatysy bar degen kúdikke ilingen.

Alaıda Jaıyq Imambaev bul pikirmen kelispeıdi:

"BJZQ – halyqtyń eńbegimen tapqan aqshasy. Biz jalaqymyzdyń 10 paıyzyn aı saıyn aýdaryp otyramyz. Memleket osy jınaqtyń bir bóligin paıdalanýǵa múmkindik berdi, halyq sol quqyǵyn paıdalandy. Kópshilik bul aqshany ıpoteka, nesıe, emdelýge jumsady. Bul qalaı qylmys bolýy múmkin? BJZQ-dan qarajat alý úshin birneshe kezeńnen ótý kerek. Barlyǵy tirkeledi jáne tekseriledi. "Tanyspen" jasaý múmkin emes. Sondyqtan stomatologıalyq klınıkany alaıaqtyqqa aıyptaý qısynsyz".

Sonymen qatar, tergeý derekterinde keıbir klınıkalar BJZQ qarajatyn "qolma-qol aqshaǵa shyǵaryp berý" úshin 10–15 paıyz komısıa alyp, jalǵan stomatologıalyq qyzmet rásimdegeni aıtylǵan. QMA bul jaıtty qylmystyq is qozǵaýǵa negiz etken bolatyn.