Olardyń aitýynsha, azamattar osy resýrs kómegimen memleket, oblys, qala, aýdan nemese aýyl biýdjeti týraly saýal qoia alady.
– Joba maqsaty – sailaýshy men depýtat arasynda naqty bailanys ornatyp, sailaýshylardyń biýdjet máselesi boiynsha belsendiligin arttyrý. Ár jyl saiyn kúzde depýtattar kelesi jylǵa biýdjet jobasyn qarastyrady. Bizdiń baqylaýymyz boiynsha, sol biýdjet aqshasyn qalyptastyratyn salyq tóleýshiler bul protseske qatyspaidy. Biýdjettiń ózi de solar úshin ázirlenip, qabyldanady. Sondyqtan biýdjettiń salyq tóleýshilerdiń kózqarasy men qalaýyn eskere otyryp qurylýy keregin eskertemiz. Talqy kezinde depýtattar sailaýshylarynyń talap-tilegin bilýi kerek. Sondyqtan azamattar suraq qoiyp, pikirin, talaby men ótinishin, aitalyq biýdjetke qatysty saýalyn jibere alýy úshin osy jobany ázirledik, – deidi "Zertteu Research Institute" sarapshysy Ǵalymjan Orazymbet Azattyqqa suhbatynda.
Joba bastamashylary barlyq oblys máslihattarynan depýtattardyń elektrondy mekenjaiyn berýdi suraǵan.
– Máslihattardyń 70 paiyzy oń kózqaras tanytty. Qaraǵandy, Jambyl, Batys Qazaqstan oblystarynyń máslihattary depýtattardyń elektrondy poshtalaryn jeke bas málimeti dep sanady. Biz sailaýshylarmen bailanys bolýy úshin ásirese tsifrlandyrý dáýirinde máslihat depýtattarynyń jumys jáne elektrondy mekenjaiy naqty jariialanýy tiis dep sanaimyz. Máselen, Aqmola jáne Shyǵys Qazaqstan oblystyq máslihattary depýtattardyń elektrondy poshtalaryn saittarynda kórsetken, bul halyq qalaýlylarymen tikelei bailanysýǵa múmkindik beredi. Keibireýleri máslihattyń korporativtik poshta mekenjaiyn berdi. [Máslihatta] "osy mekenjaiǵa jiberińder, ári qarai kimge jóneltýdi ózimiz sheshemiz" dedi, – deidi sarapshy.
Orazymbettiń aitýynsha, depýtat azamattyń hatyna jaýap bermese, bul onyń "sailaýshy aldyndaǵy ashyqtyǵy men jaýapkershiligin" bildiredi.
– Azamat suraǵyna jaýap almasa, demek depýtat onyń saýalyna nazar salmady degen sóz, – deidi sarapshy.
salemdeputat.kz saity qoldanýshynyń aldymen ashyqhat túrin tańdap, habarlamany jazyp, tizimdegi depýtatty belgilep, hatty onyń atyna jiberýine múmkindik beredi. Hat depýtattyń elektrondy poshtasyna túsedi. Jaýap alý úshin hat jiberýshi óz derekteri men elektrondy poshta mekenjaiyn kórsetýi tiis.
Uiymdastyrýshylar taqyryptyq ashyqhat jazý – sailaýshy saýaldaryna depýtattyń nazaryn aýdartýdyń álemde keń taraǵan úlgisi deidi.
Jobaǵa Quqyqtyq media-ortalyq, Factchesk.kz, Qazaqstannyń jastar aqparattyq qyzmeti (MISK), "Sotsiým-Zertteý", "Medianet" jáne "Soros-Qazaqstan" qory qoldaý kórsetken.
Qazir Qazaqstanda máslihattar men májilis depýtatymen habarlasý úshin sailaýshylar olardyń qabyldaýyna jazylýy nemese máslihat saitynda kórsetilgen telefon nómirine qońyraý shalýy kerek. Bólinetin ýaqyt shekteýli bolǵandyqtan, azamattar halyq qalaýlylarymen bailanystyń nashar ekenin, eldi tolǵandyratyn suraqtardyń kóbi jaýapsyz qalyp jatqanyn jii aitady.
