Qazaqstandyqtardyń 67,9% Konstıtýsıalyq reforma eldiń damýyna oń áser etedi dep esepteıdi. Sonymen, áleýmettik derekterge sáıkes, azamattardyń kópshiligi qoldanystaǵy QR Konstıtýsıasyn ózgertý boıynsha referendým ótkizýge oń kózqaras tanytyp otyr. Atap aıtqanda, qazaqstandyqtar mynalardy qoldaıdy:
- azamattardyń quqyqtaryn qorǵaý tetikterin kúsheıtý – 80,1%
- halyqtyń eldi basqarý isine aralasýyn keńeıtý – 76,8%,
- sýperprezıdenttik modelden prezıdenttik respýblıkaǵa túpkilikti kóshý – 73,5%,
- bılik tarmaqtary arasyndaǵy ókilettikterdi qaıta bólý – 72,3%,
- Parlamenttiń rólin kúsheıtý jáne mártebesin arttyrý – 64,4%.
– Qazaqstandyqtardyń 67,9%-y Konstıtýsıaǵa ózgerister men tolyqtyrýlar engizý boıynsha referendým ótkizý eldiń damýyna oń áser etedi dep sanaıdy. 5 maýsymda saılaý ýchaskelerine azamattardyń úshten ekisi kelmek, – dep atap ótti partıa hatshysy Dáýlet Káribek.
Qoǵamdyq saıasat ınstıtýtynyń dırektory Mádına Nurǵalıevanyń aıtýynsha, halyqtyń ózgeristerge degen suranysy turaqty túrde týyndap otyr.
– Sońǵy áleýmettik zertteýlerdiń nátıjesi qazirgi qoǵamdyq-saıası úderisterdiń oń baǵalanatynyn kórsetedi. Azamattardyń 87,5%-y belgili bir dárejede el ómirindegi ózgeristerdi qalaıdy. Suralǵandardyń 55,4%-y belsendi azamattyq ustanymǵa ıe. Zertteýge elimizdiń barlyq óńirinen 1700-den astam respondent qatysty, – dedi Mádına Nurǵalıeva.
Aıta keteıik, júıeli áleýmettanýdy qalyptastyrý maqsatynda «Áleýmet» jobasy aıasynda turaqty negizde zertteýler júrgiziledi. Al olardyń nátıjeleri ınstıtýttyń @SocioExpert telegram arnasynda jarıalanady.
– Áleýmettik zertteýlerdiń kómegimen partıa qoǵamdyq pikir skrınıngin júrgizip, tıimdilikti arttyrý úshin ony óz jumysynyń barysynda eskeredi. Biz qoǵamdyq pikirdi eskerip, onymen sanasamyz. Bul jumystyń barlyǵy Qasym-Jomart Toqaevtyń «Halyq únine qulaq asatyn memleket» tujyrymdamasynyń mánine tolyq sáıkes keledi, – dedi Dáýlet Káribek.
Óz kezeginde «AMANAT» partıasynyń atynan saılanǵan depýtat Saıasat Nurbek partıanyń úgit naýqany týraly aıtty. Halyq qalaýlylary aımaq turǵyndarymen myńǵa jýyq kezdesý ótkizdi. Al is-sharalarǵa barlyǵy 220 myńnan astam adam qatysqan.
Sonymen qatar, úgit naýqany aıasynda partıalyqtar qazaqstandyqtardyń usynystaryn jınaýǵa baǵyttalǵan respýblıkalyq aksıany bastady. Úgit naýqany bastalǵannan beri 4,5 myńnan astam talap-tilek kelip tústi. Olardyń arasynda áleýmettik jáne saıası sıpattaǵy usynystar men ótinishter basym.
Al qoldanbaly etnosaıası zertteýler ınstıtýty dırektorynyń orynbasary Aıgúl Sádýaqasova referendým ótkizýdiń halyqaralyq tájirıbesimen bólisti.
