Áielin óltirdi dep aiyptalyp otyrǵan burynǵy ministr Qýandyq Bishimbaevqa qatysty sot jaryssózi áli de jalǵasyp jatyr. Búgingi sot jaryssózinde Bishimbaevtyń qorǵaýshylary sóiledi. Sottalýshynyń advokaty Leila Ramazanova Bishimbaev 30 jyldaǵy júie úshin jaýap berýge mindetti emes ekenin málimdedi, - dep habarlaidy Dalanews.kz.
Keshe Núkenovterdiń advokaty Igor Vranchev Bishimbaevty Eski Qazaqstannyń ókili dep túirep ótken edi.
"Meniń oiymsha, bul jerde bir ǵana durys sheshim bar, ol - Bishimbaevqa eshqashan bostandyqqa shyǵýǵa múmkindik bermei, ony kináli dep taný. Esesine búkil halqymyzdy osyndai parazitterden qutqarasyzdar, bizde otyz jyldan asa ýaqyt buryn Táýelsizdik ornady, biraq eshqandai alǵa ilgerileý joq. Qoǵamnyń osy parazit bóligi, qoǵamnyń derti qai kezde paida bolǵanyn jáne olar qalai ministrler men iri kásipkerlerge ainalǵanyn bilemiz. Bireýin otyrǵyzý (túrmege otyrǵyzý - esk.) arqyly osy protsesti qaraityndardyń barlyǵyna, Bishimbaev sekildi basqalarǵa sabaq beresizder", - dedi ol.
Búgin Bishimbaevtyń advokaty Ramazanova osy málimdemege jaýap berdi.
"Keshe advokat Vranchev Bishimbaevty halyqtyń 30 jyldaǵy qaiǵy-qasiretine jaýap retinde qurbandyqqa shalý kerek dedi. Qýandyq nege bul úshin jaýap berýi kerek? 30 jyl buryn Qýandyq nábári onda ǵana bolǵan. Qýandyq jazalansa, qoǵamdaǵy máselelerdiń bári sheshimin taýyp kete me? Biz munda Qýandyqty emes, zańdy qorǵap turmyz. Qýandyqtyń ornynda kez kelgen adam bolýy múmkin, - deidi Leila Ramazanova.
Sonymen qatar, advokat sózin Abaidyń úshinshi qara sózimen túiindedi.
"Eldegi jaqsy adamdardyń báriniń ústinen beker, ótirik "shapty, talady" degen ártúrli ýgolovnyi is kórsetip, aryz beredi. Oǵan doznanie - tergeý shyǵarady. Ótirik kórmegenin kórdim deýshi kýálar da áldeqashan daiyndap qoiylǵan, baǵanaǵy jaqsy adam sailaýǵa jaramasy úshin. Ol adam basyn qutqarmaq úshin jamandarǵa jalynsa, onyń da adamdyǵynyń ketkeni, eger jalynbasa, tergeýli, sotty adam bolyp, eshbir qyzmetke jaramai, basy qaterge túsip ótkeni", - dedi ol.
