ەيەلٸن ٶلتٸردٸ دەپ ايىپتالىپ وتىرعان بۇرىنعى مينيستر قۋاندىق بيشٸمباەۆقا قاتىستى سوت جارىسسٶزٸ ەلٸ دە جالعاسىپ جاتىر. بٷگٸنگٸ سوت جارىسسٶزٸندە بيشٸمباەۆتىڭ قورعاۋشىلارى سٶيلەدٸ. سوتتالۋشىنىڭ ادۆوكاتى لەيلا رامازانوۆا بيشٸمباەۆ 30 جىلداعى جٷيە ٷشٸن جاۋاپ بەرۋگە مٸندەتتٸ ەمەس ەكەنٸن مەلٸمدەدٸ, - دەپ حابارلايدى Dalanews.kz.
كەشە نٷكەنوۆتەردٸڭ ادۆوكاتى يگور ۆرانچەۆ بيشٸمباەۆتى ەسكٸ قازاقستاننىڭ ٶكٸلٸ دەپ تٷيرەپ ٶتكەن ەدٸ.
"مەنٸڭ ويىمشا, بۇل جەردە بٸر عانا دۇرىس شەشٸم بار, ول - بيشٸمباەۆقا ەشقاشان بوستاندىققا شىعۋعا مٷمكٸندٸك بەرمەي, ونى كٸنەلٸ دەپ تانۋ. ەسەسٸنە بٷكٸل حالقىمىزدى وسىنداي پارازيتتەردەن قۇتقاراسىزدار, بٸزدە وتىز جىلدان اسا ۋاقىت بۇرىن تەۋەلسٸزدٸك ورنادى, بٸراق ەشقانداي العا ٸلگەرٸلەۋ جوق. قوعامنىڭ وسى پارازيت بٶلٸگٸ, قوعامنىڭ دەرتٸ قاي كەزدە پايدا بولعانىن جەنە ولار قالاي مينيسترلەر مەن ٸرٸ كەسٸپكەرلەرگە اينالعانىن بٸلەمٸز. بٸرەۋٸن وتىرعىزۋ (تٷرمەگە وتىرعىزۋ - ەسك.) ارقىلى وسى پروتسەستٸ قارايتىنداردىڭ بارلىعىنا, بيشٸمباەۆ سەكٸلدٸ باسقالارعا ساباق بەرەسٸزدەر", - دەدٸ ول.
بٷگٸن بيشٸمباەۆتىڭ ادۆوكاتى رامازانوۆا وسى مەلٸمدەمەگە جاۋاپ بەردٸ.
"كەشە ادۆوكات ۆرانچەۆ بيشٸمباەۆتى حالىقتىڭ 30 جىلداعى قايعى-قاسٸرەتٸنە جاۋاپ رەتٸندە قۇرباندىققا شالۋ كەرەك دەدٸ. قۋاندىق نەگە بۇل ٷشٸن جاۋاپ بەرۋٸ كەرەك? 30 جىل بۇرىن قۋاندىق نەبەرٸ وندا عانا بولعان. قۋاندىق جازالانسا, قوعامداعى مەسەلەلەردٸڭ بەرٸ شەشٸمٸن تاۋىپ كەتە مە? بٸز مۇندا قۋاندىقتى ەمەس, زاڭدى قورعاپ تۇرمىز. قۋاندىقتىڭ ورنىندا كەز كەلگەن ادام بولۋى مٷمكٸن, - دەيدٸ لەيلا رامازانوۆا.
سونىمەن قاتار, ادۆوكات سٶزٸن ابايدىڭ ٷشٸنشٸ قارا سٶزٸمەن تٷيٸندەدٸ.
"ەلدەگٸ جاقسى ادامداردىڭ بەرٸنٸڭ ٷستٸنەن بەكەر, ٶتٸرٸك "شاپتى, تالادى" دەگەن ەرتٷرلٸ ۋگولوۆنىي ٸس كٶرسەتٸپ, ارىز بەرەدٸ. وعان دوزنانيە - تەرگەۋ شىعارادى. ٶتٸرٸك كٶرمەگەنٸن كٶردٸم دەۋشٸ كۋەلار دا ەلدەقاشان دايىنداپ قويىلعان, باعاناعى جاقسى ادام سايلاۋعا جاراماسى ٷشٸن. ول ادام باسىن قۇتقارماق ٷشٸن جاماندارعا جالىنسا, ونىڭ دا ادامدىعىنىڭ كەتكەنٸ, ەگەر جالىنباسا, تەرگەۋلٸ, سوتتى ادام بولىپ, ەشبٸر قىزمەتكە جاراماي, باسى قاتەرگە تٷسٸپ ٶتكەنٸ", - دەدٸ ول.
