Memleket basshysy Qytaidaǵy Qazaqstan mádeniet ortalyǵynyń ashylý rásimine qatysty, dep habarlaidy Dalanews.kz.
Prezident Qasym-Jomart Toqaevtyń Qytaiǵa sapary aiasynda Beijińde Qazaqstannyń mádeniet ortalyǵy saltanatty túrde ashyldy. Memleket basshysy ortalyqtyń paidalanýǵa berilýin qos halyqtyń rýhani ómirindegi óte mańyzdy kún dep baǵalady.
"Muny, shyn máninde, tarihi oqiǵa deýge bolady. Bul – qazaqtyń qytai halqyna degen riiasyz kóńili. Sondai-aq, qytai jurtynyń qazaqqa bildirgen dostyq peiili. Eń aldymen osy bastamaǵa qoldaý kórsetkeni úshin asa qadirli tóraǵa Si Tszinpin myrzaǵa zor alǵys aitamyn. Qytai eliniń mádeniet jáne týrizm ministri Sýn Eli myrzaǵa, sondai-aq, osy iske atsalysqan barsha qytai jáne qazaq azamattaryna shynaiy rizashylyǵymdy bildiremin. Osy saltanatty jiynǵa meniń qytailyq eski dostarym, diplomattar, kezinde maǵan sabaq bergen ustazym Liý Shitsin myrza jáne ziialy qaýym qatysyp otyr. Barshańyzǵa ystyq yqylasymdy bildiremin. Mádeni-gýmanitarlyq bailanysymyz berik bolsa, dostyǵymyz da nyǵaia túsedi. Óner men mádeniet – túrli halyqtyń arasyn jalǵaityn altyn kópir", – dedi Qasym-Jomart Toqaev.
Prezident byltyrdan beri Astanada Beijiń til jáne mádeniet ýniversitetiniń filialy jumys istei bastaǵanyn jetkizdi. Al Qytaiǵa jasaǵan osy sapary aiasynda elimizde Lý Ban zerthanasynyń ekinshi jáne úshinshi ortalyqtary ashyldy.
"Qazaqstan men Qytai arasyndaǵy qarym-qatynas óte joǵary qarqynmen damyp keledi. Biz yntymaqtastyqtyń ekinshi "Altyn 30 jyldyǵyna" qadam bastyq. Joǵary deńgeidegi kezdesýler men kelissózder jyl saiyn tiimdi ótkizilip, ekijaqty saýda kólemi ulǵaiyp jatyr. Byltyr eki eldiń taýar ainalymy 44 milliard dollarǵa jetti. Bul – tarihymyzda buryn-sońdy bolmaǵan eń joǵary kórsetkish. Biyl da ózara saýda qarqyny tómen bolmaidy degen boljam bar. Investitsiialyq qarym-qatynas ta oidaǵydai damyp jatyr. Jalpy Qytai Qazaqstannyń eń iri saýda-investitsiialyq seriktesi bolyp sanalady. Halyqaralyq máseleler boiynsha qos eldiń ustanymdary uqsas nemese birdei dep kúmánsiz aitýǵa bolady. Osynyń bári Qazaqstan men Qytai máńgi strategiialyq seriktester ekenin aiqyn kórsetedi. Bul úrdis halqymyzdyń ulttyq múddesine sai keledi", – dedi Memleket basshysy.
