مەملەكەت باسشىسى قىتايداعى قازاقستان مادەنيەت ورتالىعىنىڭ اشىلۋ راسىمىنە قاتىستى، دەپ حابارلايدى Dalanews.kz.
پرەزيدەنت قاسىم-جومارت توقايەۆتىڭ قىتايعا ساپارى اياسىندا بەيجىڭدە قازاقستاننىڭ مادەنيەت ورتالىعى سالتاناتتى تۇردە اشىلدى. مەملەكەت باسشىسى ورتالىقتىڭ پايدالانۋعا بەرىلۋىن قوس حالىقتىڭ رۋحاني ومىرىندەگى وتە ماڭىزدى كۇن دەپ باعالادى.
"مۇنى، شىن مانىندە، تاريحي وقيعا دەۋگە بولادى. بۇل – قازاقتىڭ جۇڭگو حالقىنا دەگەن رياسىز كوڭىلى. سونداي-اق، جۇڭگو جۇرتىنىڭ قازاققا بىلدىرگەن دوستىق پەيىلى. ەڭ الدىمەن وسى باستاماعا قولداۋ كورسەتكەنى ءۇشىن اسا ءقادىرلى ءتوراعا سي سزينپين مىرزاعا زور العىس ايتامىن. جۇڭگو ەلىنىڭ مادەنيەت جانە تۋريزم ءمينيسترى سۋن ەلي مىرزاعا، سونداي-اق، وسى ىسكە اتسالىسقان بارشا جۇڭگو جانە قازاق ازاماتتارىنا شىنايى ريزاشىلىعىمدى بىلدىرەمىن. وسى سالتاناتتى جيىنعا مەنىڭ قىتايلىق ەسكى دوستارىم، ديپلوماتتار، كەزىندە ماعان ساباق بەرگەن ۇستازىم ليۋ شيسين مىرزا جانە زيالى قاۋىم قاتىسىپ وتىر. بارشاڭىزعا ىستىق ىقىلاسىمدى بىلدىرەمىن. مادەني-گۋمانيتارلىق بايلانىسىمىز بەرىك بولسا، دوستىعىمىز دا نىعايا تۇسەدى. ونەر مەن مادەنيەت – ءتۇرلى حالىقتىڭ اراسىن جالعايتىن التىن كوپىر"، – دەدى قاسىم-جومارت توقايەۆ.
پرەزيدەنت بىلتىردان بەرى استانادا بەيجىڭ ءتىل جانە مادەنيەت ۋنيۆەرسيتەتىنىڭ فيليالى جۇمىس ىستەي باستاعانىن جەتكىزدى. ال قىتايعا جاساعان وسى ساپارى اياسىندا ەلىمىزدە لۋ بان زەرتحاناسىنىڭ ەكىنشى جانە ءۇشىنشى ورتالىقتارى اشىلدى.
"قازاقستان مەن جۇڭگو اراسىنداعى قارىم-قاتىناس وتە جوعارى قارقىنمەن دامىپ كەلەدى. ءبىز ىنتىماقتاستىقتىڭ ەكىنشى "التىن 30 جىلدىعىنا" قادام باستىق. جوعارى دەڭگەيدەگى كەزدەسۋلەر مەن كەلىسسوزدەر جىل سايىن ءتيىمدى وتكىزىلىپ، ەكىجاقتى ساۋدا كولەمى ۇلعايىپ جاتىر. بىلتىر ەكى ەلدىڭ تاۋار اينالىمى 44 ميلليارد دوللارعا جەتتى. بۇل – تاريحىمىزدا بۇرىن-سوڭدى بولماعان ەڭ جوعارى كورسەتكىش. بيىل دا ءوزارا ساۋدا قارقىنى تومەن بولمايدى دەگەن بولجام بار. ينۆەستيسيالىق قارىم-قاتىناس تا ويداعىداي دامىپ جاتىر. جالپى جۇڭگو قازاقستاننىڭ ەڭ ءىرى ساۋدا-ينۆەستيسيالىق سەرىكتەسى بولىپ سانالادى. حالىقارالىق ماسەلەلەر بويىنشا قوس ەلدىڭ ۇستانىمدارى ۇقساس نەمەسە بىردەي دەپ كۇمانسىز ايتۋعا بولادى. وسىنىڭ ءبارى قازاقستان مەن جۇڭگو ماڭگى ستراتەگيالىق سەرىكتەستەر ەكەنىن ايقىن كورسەتەدى. بۇل ءۇردىس حالقىمىزدىڭ ۇلتتىق مۇددەسىنە ساي كەلەدى"، – دەدى مەملەكەت باسشىسى.
