Aıtys óneriniń aqtańgeri atanǵan Áselhan Álisheriqyzynyń elimizdiń damýy jolynda qosqan eleýli úlesi úshin berilgen tarıhı marapatty Otyrar aýdanynyń ákimi Erlan Aıtahanov bir top zıaly qaýym ókilderimen birge aqyn shańyraǵyna baryp, arnaıy tabys etti.
– Qazaqtyń tól óneri aıtysty damytýǵa qosqan úlesińiz óte zor. Keńestik kezeńniń ózinde aqyn retinde ulttyń muńyn muńdap, joǵyn joqtaǵansyz. Táýelsizdik tusyndaǵy eńbegińiz - bir tóbe. Qurmet pen marapatqa kende emessiz. Desek te, búgingi tósbelginiń orny erekshe. Elbasymyz N.Nazarbaevtyń «Bolashaqqa baǵdar: rýhanı jańǵyrý» baǵdarlamasyn Siz júıeli túrde halyq arasynda nasıhattap, júzege asyryp kelesiz. Áli de osy ıgilikti isińizdi jalǵastyra berińiz. Densaýlyǵyńyz myqty bolsyn, – dep ana keýdesine eńbektiń adal tósbelgisin taqqan aýdan ákimi Erlan Qýanyshuly qanshama ulylar dúnıege kelgen Otyrar óńiri asyl aqynymen de erekshe ekenin jetkizdi. Áselhan Álisherqyzy Ońtústik Qazaqstan oblysy, Otyrar aýdanynyń, Kóksaraı aýylynda dúnıege kelgen.
Ol «Syr boıynyń súleıi» atanǵan Ergóbek Quttybaıulynyń nemeresi. Aqyn ana kóptegen halyqaralyq, respýblıkalyq aqyndar aıtysynyń jeńimpazy atanǵan. Onyń «Alladan pármen suraǵan», «Basyńdy tikpeı baq qaıda?», «Áselhan álemi», «Syrttap ketken tamyrlar» kitaptary jaryq kórgen. Qazirgi kúnge deıin bolashaq sulý sóz súleılerin tárbıeleý jolyndp tynbaı eńbek etip, aıtys alamanyna kóptegen jas aqyndardy qosyp, qazaq ónerin urpaq balasyna aıryqsha dáripteýmen keledi.
