ايتىس ونەرىنىڭ اقتاڭگەرى اتانعان اسەلحان الىشەرى قىزىنىڭ ەلىمىزدىڭ دامۋى جولىندا قوسقان ەلەۋلى ۇلەسى ءۇشىن بەرىلگەن تاريحي ماراپاتتى وتىرار اۋدانىنىڭ اكىمى ەرلان ايتاحانوۆ ءبىر توپ زيالى قاۋىم وكىلدەرىمەن بىرگە اقىن شاڭىراعىنا بارىپ، ارنايى تابىس ەتتى.
– قازاقتىڭ ءتول ونەرى ايتىستى دامىتۋعا قوسقان ۇلەسىڭىز وتە زور. كەڭەستىك كەزەڭنىڭ وزىندە اقىن رەتىندە ۇلتتىڭ مۇڭىن مۇڭداپ، جوعىن جوقتاعانسىز. تاۋەلسىزدىك تۇسىنداعى ەڭبەگىڭىز - ءبىر توبە. قۇرمەت پەن ماراپاتقا كەندە ەمەسسىز. دەسەك تە، بۇگىنگى توسبەلگىنىڭ ورنى ەرەكشە. ەلباسىمىز ن.نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسىن ءسىز جۇيەلى تۇردە حالىق اراسىندا ناسيحاتتاپ، جۇزەگە اسىرىپ كەلەسىز. ءالى دە وسى يگىلىكتى ءىسىڭىزدى جالعاستىرا بەرىڭىز. دەنساۋلىعىڭىز مىقتى بولسىن، – دەپ انا كەۋدەسىنە ەڭبەكتىڭ ادال توسبەلگىسىن تاققان اۋدان اكىمى ەرلان قۋانىش ۇلى قانشاما ۇلىلار دۇنيەگە كەلگەن وتىرار ءوڭىرى اسىل اقىنىمەن دە ەرەكشە ەكەنىن جەتكىزدى. اسەلحان الىشەر قىزى وڭتۇستىك قازاقستان وبلىسى، وتىرار اۋدانىنىڭ، كوكساراي اۋىلىندا دۇنيەگە كەلگەن.
ول «سىر بويىنىڭ سۇلەيى» اتانعان ەرگوبەك قۇتتىباي ۇلىنىڭ نەمەرەسى. اقىن انا كوپتەگەن حالىقارالىق، رەسپۋبليكالىق اقىندار ايتىسىنىڭ جەڭىمپازى اتانعان. ونىڭ «اللادان پارمەن سۇراعان»، «باسىڭدى تىكپەي ب ا ق قايدا؟»، «اسەلحان الەمى»، «سىرتتاپ كەتكەن تامىرلار» كىتاپتارى جارىق كورگەن. قازىرگى كۇنگە دەيىن بولاشاق سۇلۋ ءسوز سۇلەيلەرىن تاربيەلەۋ جولىندپ تىنباي ەڭبەك ەتىپ، ايتىس الامانىنا كوپتەگەن جاس اقىنداردى قوسىپ، قازاق ونەرىن ۇرپاق بالاسىنا ايرىقشا دارىپتەۋمەن كەلەدى.
