«OZYURT» halal kásiporyny 2016 jyldyń aqpan aiynda «Halal Damý» JShS-nyń sertifikatyn alǵan bolatyn. Sodan beri Dini basqarmanyń baqylaýynda jumys jasap keledi.
«Jartylai daiyn ónim shyǵaratyn «OZYURT» kásiporynyna sertifikat berýimizdiń basty sebebi, halyq kóp júretin oryndarda tez daiyndalatyn taǵamdardyń shariǵat talaptaryna sai bolýy ótte mańyzdy. Bul kásiporyn «Halal Damý» JShS-nyń standarttary boiynsha sertifikattaldy. Osyndai halal ónimder shyǵaratyn óndiris oshaqtary elimizde kóbeise degen niettemiz. Óitkeni, ónimderdiń qaǵazynda halal degen tańba tursada halyq kúmánmen qaraityn boldy. Dini basqarma osy jaǵdaidy boldyrmas úshin qatań qadaǵalaý, baqylaý jumystaryn júrgizip keledi», – dedi «Halal Damý» JShS-nyń direktory Beibit Myrzageldiev.
Búgingi Qazaqstan qoǵamynda halal-ónimder men halal-qyzmetterge qyzyǵýshylyq ósip, suranys artyp keledi. Kásiporyn qyzmetkeri Erbol Imanaliv halal sertifikatyn alýdaǵy basty maqsat tutynýshylarǵa taza ónim usyný ekenin aitady.
Sondai-aq, shara barysynda halal boiynsha Aqtóbe oblysynyń ókili Jandos Sailanov óndiris oshaǵynyń jumysymen tanysyp, tájiribeden ótti. Basty maqsat imamdardyń halal máselesine qatysty alǵan bilimderin tájiribe júzinde naqtylap, kásiptik baǵdar berý. Sonymen birge, bul igi shara ókilderdiń QMDB-nyń halal sertifikatyn alǵan kásiporyndardy baqylap, zerttep-zerdeleýine múmkindik beredi.
Aita ketsek, búginde 50 kásiporyn «Halal Damý» JShS-nyń sertifikatyn alyp, «halal» standarty boiynsha ónim óndirip, halyqqa qyzmet etip keledi.
