«OZYURT» حالال كاسىپورىنى 2016 جىلدىڭ اقپان ايىندا «حالال دامۋ» جشس-نىڭ سەرتيفيكاتىن العان بولاتىن. سودان بەرى ءدىني باسقارمانىڭ باقىلاۋىندا جۇمىس جاساپ كەلەدى.
تەكسەرىس بارىسىندا كاسىپورىننىڭ شاريعات تالاپتارىن ساقتاۋ ءتارتىبى مەن ونىمدەردىڭ قۇرامى تەكسەرىلدى. سەبەبى، حالىق ونىمدەردىڭ قورابىندا حالال دەگەن تاڭبا تۇرسادا كۇمانمەن قارايدى. ال، كاسىپورىنداردىڭ جۇمىسىن ۇنەمى قاداعالاپ، باقىلاپ وتىرۋ ءونىم ساپاسىن جاقسارتۋدىڭ نەگىزگى باعىتى مەن العىشارتتارىنىڭ ءبىرى.
«جارتىلاي دايىن ءونىم شىعاراتىن «OZYURT» كاسىپورىنىنا سەرتيفيكات بەرۋىمىزدىڭ باستى سەبەبى، حالىق كوپ جۇرەتىن ورىنداردا تەز دايىندالاتىن تاعامداردىڭ شاريعات تالاپتارىنا ساي بولۋى وتتە ماڭىزدى. بۇل كاسىپورىن «حالال دامۋ» جشس-نىڭ ستاندارتتارى بويىنشا سەرتيفيكاتتالدى. وسىنداي حالال ونىمدەر شىعاراتىن ءوندىرىس وشاقتارى ەلىمىزدە كوبەيسە دەگەن نيەتتەمىز. ويتكەنى، ونىمدەردىڭ قاعازىندا حالال دەگەن تاڭبا تۇرسادا حالىق كۇمانمەن قارايتىن بولدى. ءدىني باسقارما وسى جاعدايدى بولدىرماس ءۇشىن قاتاڭ قاداعالاۋ، باقىلاۋ جۇمىستارىن جۇرگىزىپ كەلەدى»، – دەدى «حالال دامۋ» جشس-نىڭ ديرەكتورى بەيبىت مىرزاگەلدييەۆ.
بۇگىنگى قازاقستان قوعامىندا حالال-ونىمدەر مەن حالال-قىزمەتتەرگە قىزىعۋشىلىق ءوسىپ، سۇرانىس ارتىپ كەلەدى. كاسىپورىن قىزمەتكەرى ەربول يماناليۆ حالال سەرتيفيكاتىن الۋداعى باستى ماقسات تۇتىنۋشىلارعا تازا ءونىم ۇسىنۋ ەكەنىن ايتادى.
«تاماق ونىمدەرىن شىعاراتىن «OZYURT» كاسىپورىنى ەت ونىمدەرىن حالال سەرتيفيكاتىن العان ەت وڭدەۋ ورتالىقتارىنان الادى. كۇندەلىكتى 2.5 توننا دايىن ءونىم شىعارامىز. دونەرگە ارنالعان ەت، كاۋاپ ەتى، كوتلەتتەر، تارتىلعان ەت، تەفتەل تۇرلەرى شىعارىلادى. كوتلەتتىڭ 8 ءتۇرى، تۇشپارانىڭ 2 ءتۇرىن وندىرەمىز. قازاقستان مۇسىلماندارى ءدىني باسقارماسىنىڭ حالال سەرتيفيكاتىن تۇتىنۋشىلاردىڭ حالال تاڭبالى ونىمگە دەگەن سۇرانىسىنىڭ ارتۋى سەبەبتى الىپ وتىرمىز. ويتكەنى، حالال ەڭ ءبىرىنشى تازا ءونىم»، – دەدى تەحنولوگ ەربول يماناليۆ.
سونداي-اق، شارا بارىسىندا حالال بويىنشا اقتوبە وبلىسىنىڭ وكىلى جاندوس سايلانوۆ ءوندىرىس وشاعىنىڭ جۇمىسىمەن تانىسىپ، تاجىريبەدەن ءوتتى. باستى ماقسات يمامداردىڭ حالال ماسەلەسىنە قاتىستى العان بىلىمدەرىن تاجىريبە جۇزىندە ناقتىلاپ، كاسىپتىك باعدار بەرۋ. سونىمەن بىرگە، بۇل يگى شارا وكىلدەردىڭ قمدب-نىڭ حالال سەرتيفيكاتىن العان كاسىپورىنداردى باقىلاپ، زەرتتەپ-زەردەلەۋىنە مۇمكىندىك بەرەدى.
ايتا كەتسەك، بۇگىندە 50 كاسىپورىن «حالال دامۋ» جشس-نىڭ سەرتيفيكاتىن الىپ، «حالال» ستاندارتى بويىنشا ءونىم ءوندىرىپ، حالىققا قىزمەت ەتىپ كەلەدى.
