Vitse-premer Ermek Kósherbaev Qazaqstandaǵy kýrorttardy tekserý barysy týraly aityp berdi. Bul tekserýler Prezident Qasym-Jomart Toqaevtyń elimizdegi týristik salanyń kemshilikterin synaǵanynan keiin júzege asty, dep habarlaidy Dalanews.kz.
“Kýrorttardy aralaý senbi-jeksenbi kúnderine týra kelgen soń, memleket usynǵan qarapaiym múmkindikterdi paidalanýǵa týra keldi. Túnde jolaýshylar reisimen Almatyǵa ushyp bardym. Odan keiin kólikpen Qapshaǵaiǵa jettik, ishki jaǵynda jaiaý júrip tanystyq. Qapshaǵaidan Taldyqorǵanǵa deiin de kólikpen bardyq. Sol kezde TJM-niń tikushaǵymen ushýǵa múmkindik týyndap, sony da paidalandyq”, — dedi Kósherbaev baspasóz máslihatynda.
Onyń aitýynsha, Aqshi aýylyndaǵy temirjol vokzaly tym shaǵyn bolǵandyqtan, demalys mezgilinde kelýshilerdi tolyq qabyldai almaidy. Alaida bul aimaq maýsymdyq týrizmmen shekteletindikten, úlken vokzal salý tiimsiz. Osyǵan bailanysty vitse-premer jergilikti bilikke shyny sendvich-panelderden jeńil pavilon salýdy usyndy.
Kósherbaevtyń málimetinshe, jergilikti bilik pen kásipkerlerdiń birlesken kúsh-jigerimen Aqshige 70 shaqyrymǵa jýyq elektr jelisi tartylǵan. Jergilikti kásipker týrizmniń mańyzyn túsine otyryp, 110 kV qýattylyǵy bar qosalqy stantsiianyń qurylysyn qarjylandyrǵan. Bul infraqurylym, boljam boiynsha, Alakól aimaǵynyń aldaǵy 10 jyldyq damý qajettiligin qamtamasyz ete alady.
Aqshidegi temirjol vokzalynda jumys kúniniń aiaqtalýyna qarai adamdar jinalyp, óz usynystaryn bildirdi. Olar negizinen qoqys máselesin sheshý jaiynda pikir aitty. Degenmen jergilikti halyqtyń basym bóligi qanaǵattanǵan kúide bolǵanyn vitse-premer atap ótti.
Eske sala keteiik, buǵan deiin Memleket basshysy Qasym-Jomart Toqaev elimizdegi barlyq týristik nysandardy jedel túrde retke keltirýdi jáne kemshilikterge jol bergen laýazymdy tulǵalardy jaýapqa tartýdy tapsyrǵan edi. Osydan keiin Premer-ministr Oljas Bektenov oblys ákimderi men ministrlerge naqty tapsyrmalar júktedi. Sonymen qatar Prezidenttiń synynan keiin júrgizilgen tekserýlerdiń nátijesinde Týrizm jáne sport vitse-ministrine, sondai-aq birqatar ákimderge sógis jariialanǵany habarlandy.
