Vitse-ministrge qatysty is qozǵaldy
Ázirshe vitse-ministrdiń ne úshin aiypty bolyp qalǵany belgisiz. Jemqorlyqqa qarsy ulttyq biýronyń adamdary ustasa, joǵary laýazymdy hanymnyń qandaida bir jemqorlyq iske qatysy bolǵany anyq.
Ulttyq biýronyń baspasóz qyzmeti «QR Bilim jáne ǵylym vitse-ministrine qatysty sotqa deiingi tergeý jumystary bastaldy. Qosymsha aqparattardy aldaǵy ýaqytta habarlaimyz» dep qysqasha aqparat taratty.
Mán jaidy bilý úshin informburo.kz saitynyń jýrnalisteri QR Bilim jáne ǵylym ministri Kúlásh Shámshidinovaǵa habarlasqanda, ol bul iske qatysty eshteńe bilmeitindikten, túsinikteme bere almaitynyn aitypty.
Al Ulttyq biýro qyzmetkerleri tutqyndaǵan Elmira Sýhanberdieva telefony óshirýli. Ázirshe tiisti organdardan aqparat kútý ǵana qaldy.
2017 jyly Elmira Sýhanberdieva «Bolashaq» baǵdarlamasy boiynsha AQSh-ta bilim jetildirýge umtylyp, «Qaztest» júiesinde qazaq tilinen 135 ball alyp, eldiń nazaryn ózine aýdarǵanyn Dalanews.kz saity jazǵan bolatyn.
Osylaisha Elmira Sýhanberdieva AQSh-tyń Berkli ýniversitetinde bilim alý múmkindigine ie bolǵany esimizde. Sol kezde eks-ministr Erlan Saǵadiev «basshylyq qyzmettegi adamdardyń shetelde bilim alý men aǵylshyn tilin bilý týrasynda talap bar» dep túsinikteme bergen-di (Shirkin-ai, osyndai talap qazaq tiline da qatysty bolyp, ony barlyq shendiler oryndap jatsa qandai jaqsy bolar edi).
Shetelde bilim alǵan, aǵylshyn tilin jetik meńgergen, bir sózban aitqanda Amerika kórgen vitse-ministrdiń qamaqqa alynýy eldi airan-asyr qylǵany anyq.
Iá, ázirshe Elmira Sýhanberdievanyń ne búldirip qoiǵanyn anyq bilemimiz. Biraq jemqorlyqqa qarsy Ulttyq biýronyń adamdary shendilerdiń sońyna sham alyp bekerge túspeitinin eskersek, Elmira hanymnyń bir jerden múlt ketkeni anyq.
Jalpy, sońǵy ýaqyttary Bilim jáne ǵylym ministrligindegi shendilerdiń isti bolýy bul ǵana emes, Ulttyq biýro qyzmetkerleri 24 mamyr kúni Ulttyq testileý ortalyǵynyń bas direktory Ramazan Álimqulovtyń aibyn betine basyp, qolyna kisen salǵan bolatyn.
Ulttyq biýro qyzmetkerleri taratqan málimetke sensek, Ramazan Álimqulov memlekettik satyp alýda qandaida bir kompaniiaǵa kómek kórsetkeni úshin quny 9 mln teńge turatyn sý jańa Toiota-Kamri mashinasyn alǵan degen kúdikpen ustalǵany belgili.
Endi ai ainalmai jatyp, vitse-ministr quryqqa ilindi. Qalai bolǵanda da, iske jańadan kirisken ministr Kúlásh Shámshidinovaǵa qiyn bolyp tur.
Kúni keshe ǵana Memleket basshysy Qasym-Jomart Toqaev qarmaǵyndaǵy adamdary jemqorlyqqa áreketimen isti bolsa birinshi basshylar moraldyq jaýapkershilikti moiynymen kóterýi kerektigin qadam turyp aitqany esimizde.
Aitqan sóz atylǵan oq. Ony keri qaitaryp ala almaisyń. Bir emes eki birdei adamy isti bolyp jatqanda ministrdiń únsiz qalýyn qoǵam kótermesi anyq.
Jarbol KENTULY
