– Neǵurlym kóbirek eńbek etken adam sáikesinshe, kóbirek zeinetaqy alady. Bul qazirgi jastardyń uranyna ainalýy tiis. Sebebi, jastar qazirden bastap jumys istemese, qazirden bastap zeinettik jarna salmasa, jinaqtyq zeinetaqy qory júiesine qatyspasa, erteńgi kúni olardy qamtamasyz etý máselesi týyndaidy. Sebebi, bazalyq zeinetaqy deńgeiinde de budan bylai eńbek ótili esepke alynady, – dedi Svetlana Jaqypova Ortalyq kommýnikatsiialar qyzmetinde ótken baspasóz máslihatynda.
Vitse-ministrdiń aitýynsha, kelesi jyldan bastap, eldegi ortasha zeinetaqy kólemi shamamen 71 myń teńgeni quraidy. Eń tómengi zeinetaqy 33 myń teńge bolmaq. "Al eń kóp zeinetaqy týraly suraqqa jaýap bermeýge tyrysamyn. Keibir qarttar eń joǵary zeinetaqy mólsherin óz zeinetaqysymen salystyrady jáne eń joǵary zeinetaqyny talap etedi. Taǵy qaitalap óteiin, uzaǵyraq jumys istegen adam eńbegine sai, molyraq zeinetaqyǵa ie bolady", – deidi S.Jaqypova. Ministr orynbasary atap ótkendei, eldegi eń tómengi jáne joǵary zeinetaqy alatyndar sany elektrony úkimet saitynda ashyq kórsetilgen.
https://dalanews.kz/31849
