ق ر ەڭبەك جانە حالىقتى الەۋمەتتىك قورعاۋ ۆيسە-مينيسترى سۆەتلانا جاقىپوۆا قازاقستان جاستارىنا ەڭبەك ەتۋگە ەرتە كىرىسىپ، زەينەتاقى جارناسىن اۋدارىپ وتىرۋعا كەڭەس بەردى، – دەپ حابارلايدى قازاقپارات ءتىلشىسى.

– نەعۇرلىم كوبىرەك ەڭبەك ەتكەن ادام سايكەسىنشە، كوبىرەك زەينەتاقى الادى. بۇل قازىرگى جاستاردىڭ ۇرانىنا اينالۋى ءتيىس. سەبەبى، جاستار قازىردەن باستاپ جۇمىس ىستەمەسە، قازىردەن باستاپ زەينەتتىك جارنا سالماسا، جيناقتىق زەينەتاقى قورى جۇيەسىنە قاتىسپاسا، ەرتەڭگى كۇنى ولاردى قامتاماسىز ەتۋ ماسەلەسى تۋىندايدى. سەبەبى، بازالىق زەينەتاقى دەڭگەيىندە دە بۇدان بىلاي ەڭبەك ءوتىلى ەسەپكە الىنادى، – دەدى سۆەتلانا جاقىپوۆا ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.

ۆيسە-مينيستردىڭ ايتۋىنشا، كەلەسى جىلدان باستاپ، ەلدەگى ورتاشا زەينەتاقى كولەمى شامامەن 71 مىڭ تەڭگەنى قۇرايدى. ەڭ تومەنگى زەينەتاقى 33 مىڭ تەڭگە بولماق. "ال ەڭ كوپ زەينەتاقى تۋرالى سۇراققا جاۋاپ بەرمەۋگە تىرىسامىن. كەيبىر قارتتار ەڭ جوعارى زەينەتاقى مولشەرىن ءوز زەينەتاقىسىمەن سالىستىرادى جانە ەڭ جوعارى زەينەتاقىنى تالاپ ەتەدى. تاعى قايتالاپ وتەيىن، ۇزاعىراق جۇمىس ىستەگەن ادام ەڭبەگىنە ساي، مولىراق زەينەتاقىعا يە بولادى"، – دەيدى س.جاقىپوۆا.   مينيستر ورىنباسارى اتاپ وتكەندەي، ەلدەگى ەڭ تومەنگى جانە جوعارى زەينەتاقى الاتىندار سانى ەلەكترونى ۇكىمەت سايتىندا اشىق كورسەتىلگەن.

 

 

https://dalanews.kz/31849