Respublica partiiasy veipterge qarsy kúrestiń kóshin bastap, sonyń arqasynda ózin jastardyń densaýlyǵyna qamqorshy etip kórsetkisi keletini túsinikti. Biraq osy jolda, olar aqparattyq manipýliatsiiaǵa sanaly túrde jol bere bastady.
Partiia «Úkimet veipterge tolyǵymen tyiym salý sheshimin qabyldady» degen málimdeme taratqan. Alaida, Úkimet eshqandai resmi sheshim qabyldamaǵan. Áńgime, tek vedomstvoaralyq komissiia otyrysyndaǵy daýys berý týrasynda júrgen. Biraq VK (vedomstvoaralyq komissiia) otyrystarynyń Úkimet atynan Jarlyq shyǵaratyn quqyǵy joq. Olar tek keńes berýshi, usynys daiyndaýshy organ. Ári, veipterdi satý, tiym salý máselesi tek tiisti Zań aktilerimen retteledi.
Respublica partiiasy taratqan aqparatqa sáikes, partiianyń kóshpendi kezekten tys III Seziniń barysynda Májilis depýtaty Nurgúl Taý bylai dep málimdegen:
– Men óz saýalymda veipterdi satýǵa tolyq tyiym salýdy usyndym. Balalardyń densaýlyǵy men taǵdyry úshin kúres óz nátijesin berdi! Keshe biraýyzdan derlik (12 qarsy 2) vedomstvoaralyq komissiia músheleri veipterdi satýǵa, ákelýge, eksporttaýǵa jáne óndirýge tolyq tyiym salýdy engizýge daýys berdi.
Bul tek daýys qana. Ony Úkimet veipterdi satýǵa tiym salady dep qabyldamaý kerek. Sebebi, Úkimet VK-dan basqa, salyq organdaryn basqaratyn Qarjy ministrliginiń, Ulttyq ekonomika ministrliginiń ýájderin tyńdaýy tiis.
Osy oraida, memleket basshysy Qasym-Jomart Toqaevtyń ózi veipke qatysty, «osy qaýipti qubylyspen kúresý úshin júieli ári shuǵyl sharalar qabyldaý kerek, tek tyiym salýmen másele sheshilmeidi», - degen bolatyn.
Tek qana tiym salyp tastaý, eshbir ýájdi tyńdamaý, sol arqyly saiasi upai jinaý qiyn emes. Respublica partiiasy ókinishke orai osyndai jeńil jolǵa túse saldy. Biraq odan tyǵyp satatyn veip sany azaimaityn bolady. Salyq tólep otyrǵan, óz óniminiń sapasyna jaýap beretin resmi satý oryndary jabylmaq. Ornyna naryqty sur import, esepsiz kontrafakt buiymdar jaýlaityny anyq.
Osy rette, artyq qylamyz dep tyrtyq qylyp almaimyz ba dep suraǵymyz keledi. Iia, tiym salyp, jaýyp tastaý qiyn emes. Zań qabyldansa boldy.
Biraq kontrafaktpen kim kúresedi, odan veip shegetinder sany azaia ma? Depýtattar úshin tek zań qabyldansa boldy. Ol oryndala ma, oryndalmai ma, onda esh sharýalary bolmaidy.
