Respublica پارتياسى ۆەيپتەرگە قارسى كۇرەستىڭ كوشىن باستاپ، سونىڭ ارقاسىندا ءوزىن جاستاردىڭ دەنساۋلىعىنا قامقورشى ەتىپ كورسەتكىسى كەلەتىنى تۇسىنىكتى. ءبىراق وسى جولدا، ولار اقپاراتتىق مانيپۋلياسياعا سانالى تۇردە جول بەرە باستادى.
پارتيا «ۇكىمەت ۆەيپتەرگە تولىعىمەن تىيىم سالۋ شەشىمىن قابىلدادى» دەگەن مالىمدەمە تاراتقان. الايدا، ۇكىمەت ەشقانداي رەسمي شەشىم قابىلداماعان. اڭگىمە، تەك ۆەدومستۆوارالىق كوميسسيا وتىرىسىنداعى داۋىس بەرۋ تۋراسىندا جۇرگەن. ءبىراق ۆك (ۆەدومستۆوارالىق كوميسسيا) وتىرىستارىنىڭ ۇكىمەت اتىنان جارلىق شىعاراتىن قۇقىعى جوق. ولار تەك كەڭەس بەرۋشى، ۇسىنىس دايىنداۋشى ورگان. ءارى، ۆەيپتەردى ساتۋ، تيىم سالۋ ماسەلەسى تەك ءتيىستى زاڭ اكتىلەرىمەن رەتتەلەدى.
Respublica پارتياسى تاراتقان اقپاراتقا سايكەس، پارتيانىڭ كوشپەندى كەزەكتەن تىس III سەزىنىڭ بارىسىندا ءماجىلىس دەپۋتاتى نۇرگۇل تاۋ بىلاي دەپ مالىمدەگەن:
– مەن ءوز ساۋالىمدا ۆەيپتەردى ساتۋعا تولىق تىيىم سالۋدى ۇسىندىم. بالالاردىڭ دەنساۋلىعى مەن تاعدىرى ءۇشىن كۇرەس ءوز ناتيجەسىن بەردى! كەشە ءبىراۋىزدان دەرلىك (12 قارسى 2) ۆەدومستۆوارالىق كوميسسيا مۇشەلەرى ۆەيپتەردى ساتۋعا، اكەلۋگە، ەكسپورتتاۋعا جانە وندىرۋگە تولىق تىيىم سالۋدى ەنگىزۋگە داۋىس بەردى.
بۇل تەك داۋىس قانا. ونى ۇكىمەت ۆەيپتەردى ساتۋعا تيىم سالادى دەپ قابىلداماۋ كەرەك. سەبەبى، ۇكىمەت ۆك-دان باسقا، سالىق ورگاندارىن باسقاراتىن قارجى مينيسترلىگىنىڭ، ۇلتتىق ەكونوميكا مينيسترلىگىنىڭ ۋاجدەرىن تىڭداۋى ءتيىس.
وسى ورايدا، مەملەكەت باسشىسى قاسىم-جومارت توقايەۆتىڭ ءوزى ۆەيپكە قاتىستى، «وسى ءقاۋىپتى قۇبىلىسپەن كۇرەسۋ ءۇشىن جۇيەلى ءارى شۇعىل شارالار قابىلداۋ كەرەك، تەك تىيىم سالۋمەن ماسەلە شەشىلمەيدى»، - دەگەن بولاتىن.
تەك قانا تيىم سالىپ تاستاۋ، ەشبىر ءۋاجدى تىڭداماۋ، سول ارقىلى ساياسي ۇپاي جيناۋ قيىن ەمەس. Respublica پارتياسى وكىنىشكە وراي وسىنداي جەڭىل جولعا تۇسە سالدى. ءبىراق ودان تىعىپ ساتاتىن ۆەيپ سانى ازايمايتىن بولادى. سالىق تولەپ وتىرعان، ءوز ءونىمىنىڭ ساپاسىنا جاۋاپ بەرەتىن رەسمي ساتۋ ورىندارى جابىلماق. ورنىنا نارىقتى سۇر يمپورت، ەسەپسىز كونترافاكت بۇيىمدار جاۋلايتىنى انىق.
وسى رەتتە، ارتىق قىلامىز دەپ تىرتىق قىلىپ المايمىز با دەپ سۇراعىمىز كەلەدى. يا، تيىم سالىپ، جاۋىپ تاستاۋ قيىن ەمەس. زاڭ قابىلدانسا بولدى.
ءبىراق كونترافاكتپەن كىم كۇرەسەدى، ودان ۆەيپ شەگەتىندەر سانى ازايا ما؟ دەپۋتاتتار ءۇشىن تەك زاڭ قابىلدانسا بولدى. ول ورىندالا ما، ورىندالماي ما، وندا ەش شارۋالارى بولمايدى.
